ONGWEDIVA – Metengenekothanako lyomumvo 2024/25, elelo lyondoolopa yaNgwediva omwa tengeneke oomilliona N$2.5 tadhi ka longa ehala lyomayinyanyudho mondoolopa moka.
Omupopiliko gwondoolopa yaNgwediva Otillie Shingenge okwa ti ehala tali popiwa, oli li konima yomatungilo goChicco Mall.
Shika okwe shi popi mesiku kwali kwa egululwa pambelewa iilonga yoku tunga ehala ndjoka.
“Elalakano lyokuyapo nehala ndyoka okugandja ehala lyomainyanyundho kaakalimo yomOngwediva opo ya kale ye na mpoka haya vulu okuya uuna ya hala okupita mo momagumbo gawo,” ta fatulula ngaaka.
Mayola gwondoolopa Taarah Shalyefu okwa ti, omahala gokwiinyanyundha oga pumbiwa moshigwana.
“Omahala ga tya ngaaka ohaga yambidhidha wo natango kuundjolowele womuntu, oshowo ohaga gandja oompito dha yooloka kaanona oshowo kaanyasha opo kaaya kale momapandaanda moka hamu zi omashongo ogendji,” ta ti ngaaka.
Ta ti, ehala lyatya ngiika natango otali humitha komeho ondoolopa yaNgwediva.
“Ehala ndyoka otali ka longwa momalweetho gatatu no lya tengenekwa lyi kale lya pwa no tali ka tameka okulongithwa muMalitsa gomumvo taguya,’’ ta po pi ngaaka.
Shalyefu okwa ti, ehala ndyoka otali kala lina iinyangadhalwa yaanona ayihe oshowo omahala gokuningilwa iituthi yomaludhi agehe.
Ta gwedha po kutya ehala ndyoka otali ka yambindhindha aakalimo yOngwediva oyendji oshoka oya kondwa omagulu okuya kokule.
“Ta ti oproyeka ndyoka itayi popi ashike omayinyanyudho ihe otayi ka eta wo ompito yiilonga moshigwana,’’ Shalyefu ta ti ngaaka.
Ta popi kutya ondoolopa ngele oyina omahala gatya ngaaka ohayi hili wo aatelelipo oshowo aanangeshefa ya yooloka shoka tashi tashi ka kokeka eliko lyondoolopa yOngwediva.
Ngoka ta ungaunga nokupalana oshowo omayakulo guutekinika melelo lyondoolopa lyOngwediva David Mulokoshi okwa fatulula kutya olweetho lotango olwa kwatela mo odhalate yolugumbo lwehala, omweelo gwiihauto oshowo gwaantu yokolupadhi.
“Ominino dhomeya oshowo elambo lyonyata oya kwatelwa mo molweetho lwotango,’ ta fatulula ngaaka.