Auleria Wakudumo 

Ongudu inene yovakwashiwana oyo ya li ya shunifwa ko Omaandaxa oya holoka momuvalu munene okulishangifa oshimaliwa shoshikukuta.

Omashango aa okwa hovela mEtitatu loshivike eshi mOngwediva. Ombelewa youministeli woukwashikekookanhu, ekandulepo londjala nonghalonawa oya holola kutya natango ovakwashiwana ova holoka molwaalu munene udule nokuli ou wa shunifilwe ko Omaandaxa.

Nonghela, ovakwashiwana vahapu ova holola eudonai eshi omalishangifo vati taa ende kashona nomolwaashi ombelewa vati tai pula eembapila odo vehe na. Onghela, Ovakwashiwana ova ti ove ya pombelewa komatango okudja po18h00 no19h00, va ninga okakonghola, opo va shiive okuninga votete mokushangifwa. Ova ti ova nangala pombelewa ve dule po50 onguloshi. 

Nande ongaho, omunambelewa mouministeli woukashikekookanhu Johanna Nangolo okwa holola ta ti nande ovakwashiwana va lombwelwa osho tava etelele, vahapu vati ove ya vehe na eembapila de lixwa po. 

Nangolo okwa ti yoo kutya vamwe ava ve ya ohava longo ile ve li meumbo mu na ovanashilonga.  Omunambelewa umwe okwa holola kutya movanhu omilongo mbali tave ya meni, ohamu dulu okudja ashike vavali ile vatatu ovo va etelela oipumbiwa aishe manga vakwao inava etelela ile havo tava pulwa. 

Umwe womwaavo va shunifwa ko okwa ti kutya ke shi kutya ouministeli otau yandje ekwafo kovanhu velipi ngeenge navo ova pumbwa ekwafo. 

“Otwe ya po18h00 komatango onghela, opo twa nangala apa ashike paife ohatu shunifwa ko. Ouministeli otau pula oipumbiwa ihapu naimwe katu na apa hatu i kufa. Eshi twa li tu shi hasho tashi pulwa meni,” ta holola.

Omupopiliko wouministeli woukwashikekookanhu, Lukas Haufiku okwa kwashilipaleka kutya kakele kaavo ihava mono oyuuyemo, ovakwashiwana ngaashi ovakulupe, ovahu ovo hava mono oshimaliwa shoulema, eefiye nakeshe ou ha mono ekwafo okudja kepangelo ile omunhu ha di meumbo lovanhu va tumbulwa metetekelo ita mono ekwafo olo. 

Albertina Simon umwe womwaavo va shangifwa okwa ti naye okwa li a shuna a ka tale imwe yomoipumbiwa oyo kwa li a dimbwa ko. Simon okwa ti okwa uda nawa eshi a shangifwa noshimaliwa otashi ke mu kwafa osho yo ovaneumbo laye. 

Omukulunhuwiliki wouministeli woukashikekookanhu, ekandulepo londjala nonghalonawa Ndiitah Nghipondoka-Robiati okwa holola ta ti okukwashilipaleka kutya oshimaliwa shoshikukuta osha fika keshe ou sha nuninwa, ovanambelewa okudja kombelewa youkashikekookanhu otava ka talela po omalelo eedoolopa a yooloka, eedoolopa, nomikunda okudja 11 Novemba fiyo 21 Desemba. 

Ovanambelewa otava ka kwashilipaleka omadina ovakwashiwana, okushangifa omadina ape, okushangifulula, nokuweda ouyelele waavo hava tambula nale oshimaliwa.  “Eshi itashi kwashilipaleke kutya keshe eumbo ihali tema ile li na ovanhu ihava mono oyuuyemo ola kufwa ouyelele nokushangifwa op ova dule okumona ekwafo,” Robiati ta ti. 

Robiati okwa ti mopaife oprogramma otai tale eedoolopa ngaashi Karasburg, Oranjemund, Ongwediva, Okahao, Oshikuku, Outjo, Oniipa, Omuthiya, Grootfontien, Okakarara, Otavi noHelao Nafidi okudja mo11 fiyo 23 Novemba neudo. 

Omanga okudja vati mo 25 Novemba fiyo 25 Decemba, ouministeli youkashikekookanhu tau ka hovela needoolopa ngaashi Swakopmund, Karibib, Mariental, Keetmashoop, Luderitz, Oshakati, Ondangwa, Outapi, Ruacana, Opuwo, Khorixas, Tsumeb, Oshivelo, Otjiwarongo, Okahandja, Eenhana, Nkurenkuru, Rundu, Gobabis noKatima Mulilo. 

Natango oprograma otai ka talela po omalelo opadoolopa mukunda ngaashi Gibeon, Gochas, Kalkrand, Stampriet, Maltahohe, Aroab, Koes, Tses, Berseba, Bethanien, Tsandi, Kamanjab, Okongo, Divundu, Leonardville, Otjinene, Witvlei noBukalo. 

“Onghene ouministeli otau pula elongelo kumwe lomalelo aeshe eedoolopa novakufimbinga aveshe opo vakwafele ouministeli okukwashilipaleka kutya eyambidido eli ola pewa ovo ve li momhumbwe nove li pumbwa shili,” Robiati ta ti. 

Robiati okwa pula yoo ovakwashiwana va etelele omaufemba a pumbiwa okulishangifa ngaashi okamutwe koshilongo ka mwene weumbo oshoyo kovaneumbo aveshe (eekopi), ombapila yolukalwa tai ulike apa ho di, ombapila yohombo ngeenge oyo omukwashiwana ta longifa, odjapo yedalo, okambaapila komafendelo amuni, naikwao ngeenge to ka tambula oshimaliwa, ile to fiki peenghatu dimwe delishangifo. 

Keshe omunhu kutya okwa tambulile nale oshimaliwa okwa teelelwa vati e ke lishangifulule opo a dule okupewa vali oshimaliwa olweefo la shikulako. 

Nonande ovakwashiwana ova yelifilwa kutya omalishangifo otaa xulu nena, natango ova fitika ashike omuvelo wombelewa youkashikekookanhu, va hala vati okushangwa nena.  -wakudumoauleria@gamil.com