OSHAKATI – Elelo lyondoolopa lyOshakati olya kwashilipaleke kutya mboka taya ka telela po konooli momwedhi tagu ya, otaya adha ondjila ndyoka tayi longwa okuza pOkatana service okuya kOmatala gaShakati ya pwa okulongwa.
Ondjila ndjoka ya taakana epandaanda enene lyOndoolopa yaShakati oya ninga esiku tayi longwa, namayola gwondoolopa yOshakati Leonard Hango okwa ti iilonga mbyoka oyi li oopelesenta 90% okukala ya pwa.
“Mboka ye na iilonga mbyoka otaya longo nuudhiginigini noya kwashilipaleke kutya sho omasiku gomatango omanene taga ka adhathana, nondjila ndjoka oya pwa okulongwa,” ta popi ngaaka.
Ta fatulula kutya ondjla ndjoka oya longwa nelalakano lyokutopola oondjila opo kaadhi kale dha thinana okuya komatungo omanene goositola Game osho wo Etango.
Ta ti, oshigwana ohashi longitha ondjila yimwe ayike ndjoka hayi kala yi na omukweyo gwiihauto omuleeleka, uunene pethimbo lyomwedhi gwa sa osho wo ethimbo lyomatango omanene.
“Ondjila ndyika oyimwe yoomopreyeka twa longo nuumvo, notu uvite uuntsa sho tatu gwanithile po oshigwana shetu shoka tatu shi uvanekele,’’ ta popi ngaaka.
Hango ta ti, elalakano okuhumitha komeho ondoolopa yawo yaShakati, oku yi tula po nkatu mpoka ye yi halela.
Ta gwedha po kutya elelo lyondoolopa otali tsikile okulonga nuudhiginini opo ondoolopa yaShakati yi kale yi ikalekelwa momalelo goondoolopa adhihe moshilongo.
Elelo lyondoolopa lyOshakati natango otali tseyithile aakalimo kutya ondjila ndjoka yuuka kOshakati Dry Cleaner otayi kala ya pata Olyomakaya nOsoondaha yomasiku 16 sigo 17 sho taku ka longwa elambo lyonyata lyehala lyomayinyanyudho tali ithanwa Oshakati Recreational Park.
Okwa kumagidhwa aahingi yiihauto ya simaneke omandhindhiliko gomoondjila momundhingoloko moka omanga aayendanandjila ya kumagidhwa ya longithe oondjila dhokooha.
Kakele koondjila dhomoShakati, uuministeli womidhingoloko owa tseyitha etengenekothaneko okutula mEtosha oopate dhooteya, nonando ngashingeyi oye li metifa lyokuopaleka oondjila dhoka.
Omugandji gwomauyelele muuministeli womidhingoloko, iihwa nomapashiyono Romeo Muyunda okwa ti otaya longo oondjila ndhoka mEtosha sho ya mono omanyenyeto taga indjipala kutya aatalelipo mEtosha otaya nyenyeta iihauto yawo tayi sasuka po koondjila oshoka kadhi li monkalo ombwaanawa.
“Shika osha talika ko onguupyakandhi uunene, tau pumbwa okukandulwa po meendelelo. Uuministeli owa kutha omambakumbaku gatatu ngoka taga opaleke oondjila ndhoka,”ta ti ngaaka.
Ta fatulula kutya oshoka okoopaleka hoka ohaku kala po ashike ethimbo eshona oye na edhiladhilo lyokweeta oteya mEtosha,’’ ta fatulula ngaaka.
Romeo okwa ti, oondjila ndhoka otadhi kala dha pwa okulongwa miiwike iyali ya taalelwa opo aatalelipo taye keya pethimo lyefudho oondjila odhi li monkalo yili nawa.
Ta ti oondjila ndhoka tadhi ka longwa ongaashi okuza kOkaukuejo okuya koHalali oshowo okuza kOnamutuni okuya koKing Nehale.
“Otwa inekela kutya oondjila ndhoka ngele dha pu okulongwa otadhi ka hwepopaleka onkalo notadhi ka hila wo aatelelipo oshoka uupyakadhi owa kandulwa po,’’ ta ti ngaaka.
Ta kumagidha kutya,omanga oondjila dhoka tadhi longwa oshigwana otashi kumagidhwa shi longithe ondjila okuza kOkakuejo okuya koHalali okupitila koGemsbokvlakte, Olifantsbad osho wo Aus oshoka hoka ondjila oyi li hwepo.
Romeo okwa popi kutya ehala lyomatalelepo olya pumbwa okukala lyi na omayakulo ge li nawa opo lyi hile aatalelipo.