Auleria Wakudumo
Opolifi moshitukulwa shaShana oya tula ovakwashiwana vanhe moipandeko eshi va hangika noushako voufila 100, vo 20kg ovo va nhuninwa oshikukuta momudingonoko waShakati. Ovakwashiwana va tulwa moipandeko ove na eedula 29, 31, 33 no38.
Omukonakoni woimbuluma moshitopolwa shaShana, Deputy Commissioner Frederick Ndjadila okwa holola ta ti ovafekelwa, ovalumenhu vatatu nomukainhu umwe ova tulwa moipandeko lwopo 16h00, va mangelwa kEhenye mOshakati.
Oushako va vakwa ove na vati ongushu i fike N$18 729.
Ndjadila okwa holola kutya ova mona ouyelele komulineekelwa wonhumba, osho sha eta opolifi i ninge omakonaakono a wedwa po noku ka hada onhele oyo yali tai feekelwa i na oushako voshikukuta.
“Mokuhada, opolifi oya hanga nokukwata ko oushako voufila 100 aveshe ou20 kg,” Ndjadila ta ti.
Oushako vati ova hangika monduda imwe. Ova twalwa koshitaasi shopolifi kOnawa opo opolifi vati i ninge omapekaapeko a wedwa po.
Ndjadila okwa weda po ta ti ovafekelwa ova taalela oshibofa shokuhangika noinima tai feekelwa ya vakwa osho yo okuvaka.