OSHAKATI – Opolisi moshitopolwa shaShana oya londodha oombaanga nomahangano gaakeleli yomaliko ga kale uupathi ethimbo lyaDesemba.

Omukuluntu gwopolisi moshitopolwa shaShana Naftal Lungameni Sakaria okwa ti ethimbo ndyoka lyomatango omanene ookalyamupombo ohaya kala unene ya hala iimaliwa iinene tayi zi nenge tayi falwa koombanga.

“Otandi kumagidha opo mu kale mu na egameno lya pama opo aafuthi yaa mone ompito ndyoka,” ta kumagidha ngaaka.

Ta ti opolisi otayi kala ya ilongekidha ethimbo kehe okuyambidhidha.

Ta gwedha po kutya opolisi otayi tsikile okukumagidha aakwashigwana kaaya ende niimaliwa oyindji komalutu kaaye li naakeeleli. 

“Iimaliwa oyindjiyindji inayi pumbwa okuhumbatwa komuntu gumwe koomuma. 

Naya kale haya kutha omahangano gaakeeleli yomaliko, ogo ga kale taga mbaanga iimaliwa nenge ya kale taya thindikilwa kopolisi.

“Longitheni wo uukalata wopautekenika okulanda shi vulithe okuhumbata oshimaliwa oshindji koomuma,”Sakaria ta kumagidha. 

Ta ti oshigwana nashi kale aluhe shi na oongodhi dhopolisi dhomeendelelo dhomomudhingoloko gwawo.

Natango okwa kumagidha oshigwana shi kale aluhe sha kotoka kehe mpoka tashi ende, nongele pwa holoka omayinyengo kaage li nawa shi lopotele opolisi kuyele.

Sakaria okwa li wo a londodha aakwashigwana kutya inaya thiga omagumbo gawo kage li metonatelo ngele otaya yi koondoolopa dhilwe oshoka ookalyamupombo otaya vulu okulongitha ompito ndjoka okuteya omagumbo ngoka.

“Ethimbo ndyoka oohauto inadhi kala iinima yongushu oshoka shoka osho hashi ya hili okuteya oohauto,” ta londodha.

Sakaria okwa ti opolisi mOshana itayi ka pitika nando iimbuluma, na kehe ngoka ta ka yona nokupita oompango dha tulwa po otaya ka tala ngoka e na oonkondo evule mukwawo.

Ta ti enyanyu nombili oyo ya halela oshigwana.

-vkaapanda@nepc.com.na