Auleria Wakudumo

ONGWEDIVAS – ǀOadisidi !nâ hâ sîseno ǂkhamkhoen Ongwedivas din ge ǂhanuba ra sîsenba khoen ǀkha ǂguro soade ra !khōgu, ǀnîn ân ge !oesa nē beors ai!â a !khō!oa in ǂGaoǀkhādi ai a sîsenxa !Gao!gao Hōǂgās Marisihuib (CBIG) xoamâisendi !nâ am!nâxa. Xoamâisendi ge ǂguro ǂanǂans !oagy mantaxtsēs ai ga tsoatsoa hâ, xawen ge sīn ge o, ǁaru kaihe tsî an Wunstaxtsēs ai oahā ti ge mîbahe tsîs ge ǁnās !oagu wekheb Wunstaxtsēs ai ge ǂnāǁnâ. 

ǀNî ǁanǂgāsaben ge New Eraba gere mîba, ǁîn ge ai!â ge ǂnôa i tsās di 18:00 tsî 19:00 irs hâra ai ǀnai a hāsa, ǂgom!gâb ǂgurosen nî xoamâisens dib ai. ǁAupexan ge nē xoamâisens !aroma 50 khoena ǁnā beros ai!â ge hâǂkhai. ǁNā wunstaxtsēs ais tsînan ge ǂauna xoamâisenaona gere sîǁaruhe, ǂgaoǀkhāsa ǂkhaninan ge ūhâ tama hâ i !khais xa !aromahe hâse tsîn ǀnîna ǂgaoǀkhādi ai dīǀoaǀoa tama ge hâ ise. Senior mâisas, administarasis dis, Johanna Nangolos ge ge mî, ǂauna khoen ǀoasase xoaǂgā!nâsa tama ǂkhanin ǀkha gere hâsa, ǂhôaǂgaredi !nân harase ǂgaokhādi tsî ǂhâbasa xūna ǂananhe hâs khao!gâ. 

Sî-oahe gere khoen ǁaegun ge sîsenǀûs di kurina ge a sī!nâ ǂhanub ssenaon hîa ǀnai ǁkhâkorobese ǂhanuba xu mâ ra domdorena. Ministeris di mîgowaba-aob, Lukas Haufikub ge nē ra xoamâihe khoen nî !khō!oa N$600 xa gere mî!ā, ǁnān hîa îbe-îbe a ǂkhawusa omaridi hîa ǀguis khami i hōǂgā-e ūhâ taman !aroma ǀgui a ǂâi!nâǁguisa !khaisa. aiǁgause-i hâna ǀgui kairakhoe-e ǁnā omaris !nâ nî hâs kara, os ge ǁnā omarisa nē marisa !khō!oas !nâ am!nâxa tide, ǁnā kairakhoe-i ǀnai ǁkhâkorobese ǂhanuba xu ra domdore xui-ao. 

“Nēs ai!â ra ǂâibasen !khais ge, ǀgui khoe-i omaris !nâ nî sîsens kara, on ǁîn tsîna nē marisa !khō!oa tidesa, ǀnai-i ǀgui khoe-e hōǂgāsa ra ǂgâxa-ū amaga. CBIGs maris ge ǀguiǀguibe khoena māhe tama hâ, xawe omaris !aroma ra māhe, tsî nēpas ge ǀhomxasib ra ǂgâxasa nē maris ǂhanuse ǁnâu!āhe tama amaga,” tib ge Haufikuba ge mî. 

Ministeris di sîsenǂuira direkter-I, Ndiitah Nghipondoka-Robiati ge ge mî, !kharagagu !nandi nî 11 ǀHōǂgaeb disa xu 21 Hôasoreb 2024 dis kōse sîǂuihesa !ā!khōmâidi !oa xoamâisens sîsenga dīs !aroma.