Hilma Nakanduungile 

Omupresidente Nangolo Mbumba okwa hokolola nakusa Noah Lyaala Tuhadeleni onga gumwe gomomapendafule ngoka ga kondjela oshilongo pwaa na omatengauko.

Mbumba okwa popi ndhoka poshituthifumbiko shaTuhadeleni sha ningwa ohela pomawendo gomapendafule mEenhana. 

Okwa pewa efumviko lyopambelewa.

“Tuhadeleni ina dhana ashike onkandangala mekondjelomanguluko  lyoshilongo, ihe okwa li wo gumwe gwomAanamibia mboka ya kondjele nokukaleka po uukumwe, ombili nengungumano mOshilongo,” Mbumba ta ti ngaaka. Tuhadeleni, okwa mana oondjenda mo-29 Kotomba 2024, mepipi lyoomvula 74.  Okuza sho oshilongo sha manguluka, Tuhadeleni okwa kala omukalimo gomomukunda Omakango mEndola moshitopolwa shaHangwena noye a li kansela gotango gwoshikandjogololo shaNdola. 

He, Eliaser Noah Inamutwika Tuhadeleni a tseyika nedhina Kaxumba kaNdola, ogumwe gomaatotipo yongundu yoSwapo, mboka yu umbu ondjembo yotango kOngulumbashe. Okwa li a ningi oomvula 18 kondholongo yaRobin Island hoka a li a tokolelwa ondholongo yonkalamwenyo. Okwa mangululwa mo 1985, nokwa hulitha mo1997. 

Omukokoli Presidente Sam Nuujoma okwa ti, Noah Lyaala Tuhadeleni ota kala nokudhimbulukiwa molwonkandangala a dhana mekondjelomanguluko lyOshilongo, nokonima oshilongo sho sha manguluka.

Omupresidente Hifikepunye Pohamba ngoka a li gumwe gwomaalilasa naye okwa hokola ezepo lyanakusa Tuhadeleni lya thiga po omwaka onene, molwashoka okwa li ongudhi ya kola  nonzo yuunongo,

Nakusa Tuhadeleni okwa kala kansela gwoshitopolwahogololo shaNdola, okuza mo1992 sigo omo 2004. Okwa li wo oshilyo shomutumba gwopashigwana pokati ko1998 no2004, nosho wo omugandjimayele gwaNgoloneya gwaHangwena okuza mo2011 sigo omo2014). Okwa thiga ko omukulukadhi gwe, noyana yatano. Hilma Kanduungile omunambelewa gomauyelele kuuministeli womauyelele mOhangwena