Ngoloneya gwoshitopolwa shaShana Elia Irimari okwa holola euvo nayi konkalo yaakalimo yomOshakati, mboka kaye na ko nasha nuuyogoki. 

Ngoloneya okwa popi ngaaka Etitano sho elelo lyondoolopa lyaShakati lyali tali opaleke ondoolopa ayihe koonono, kohi yoshipalanyolo “Okukaleka po uuyogoki,”. “Oshigwana osha lombwela shi kale tashi longitha omandoloma giiyagaya ngoka gena ashike N$950, tayi futwa methimbo lyoomwedhi 12, ihe sigo onena otaya longitha ashike oonayilona,” ta nyenyeta ngaaka. Irimari ta ti, okwa ndhindhilike kutya aakalimo yomondoloopa yaShakati kayena ko nasha nuuyogoki, oyendji ohaya ekelehi iiyagaya kehe mpoka, naashoka ohashi ningwa unene momalukanda. 

Pethimbo lyoshikonga shika okwa li a kunkilile omuthindo kutya ekako oshinima oshiwinayi onkene uuyogoki nawu kale oshinima sho tango. 

“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo kuyandwe omikithi tadhi vulu okupitila moongaga,” ta popi ngaaka. Ta kumagidha oshigwana shaShakati kutya, nashi kale sha tula uuyogoki komeho. 

“Ondi inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka. 

Irimari okwa kumagidha oshigwana kutya, esiku ndyoka ina li kala olyo ta li opalekitha ondoolopa yaShakati, ihe nashi kale onkalondjigilile noshi holelwa sho ku opaleka aluhe. 

Ta gwedhe po ta ti, okwa nyanyukilwa aakalimo yomOshakati sho ya kutha ombinga oku opaleka ondoolopa yawo. 

Omupopiliko melelo lyondoolopa lyOshakati Katarina Kamari okwa ti, uuyogoki otawu kala po ashike uuna, kehe gumwe tewu simaneke noku wu tula miilonga. “Ondoolopa otayi kala ombwaanawa uuna ya yela,onkene otandi, tsikile okukumagidha oshigwana shaShakati shi kaleke po uuyogoki,” ta popi ngaaka. 

Ta ti, kehe gumwe na kaleke ehala lye lya yela, opo shi kale oshi holelwa sha kehe gumwe. 

Ehumo komeho lyondoolopa ohali holoka una pe na uuyogoki. 

Kamari, okwa kumagidha wo oshigwana shi tsike omiti. 

Ta ti omiti ohadhi dhana onkandangala mo mikalo ndha yooloka, nodha simana wo monkalamwenyo yo muntu kehe. 

“Omiti ohadhi opa l eke oondoolopa, ohandhi gandja ombepo nohadhi kol eke uundjolowele womuntu,” ta ti ngaaka. 

Kamari okwa kumagidha natango oshigwana ta ti, nashi kale oshinakugwanithwa sha kehe gumwe okutsika omiti.