OKAHAO-Nonando esiku lyokuhogolola okwali lya tokolwa lyi kale ashike limwe omasiku 27 gaNovomba olya katsikila sigo omasiku 28 omolwa anuwa oombapila dhokuhogolola inaadhi ganwa.
Ongula yEtine moshitopolwa shaMusati aanambelewa yomahogololo yamwe oyali yaadhika pomahala mpoka taya longele ya tegelela mboka yali inaaya mona ompito yokuhogolola Etitatu, ya hogolole ongula ndyoka.
Okomisi yomahogololo moshilongo oyali ya pititha omushangwa kutya oya gwedhako ethimbo opo kehe ngoka a hala okuhogolola ihe ka kwali a mona ompito yokuhogolola a hogolole ongula yEtine.
Aanambelewa oyendji oyali ya gandja omanyenyeto gawo kutya oya kala ya taalela uupyakandhi woombapila dhomahogololo, ndhoka kwali dha tadhi ya shunitha monima sho kwali ya tegelela okupewa kwaamboka yena odhindji nay popepi.
Omahala gomahogololo ogendji moshitopolwa shaMusati ogali guudha aantu ya hala okuhogolola ihe oyali ya kalekwa momikweyo oshoka oombapila odhali dha pwa po.
Omunambelewa gomahogololo puAshipala moshikandjohogolola shaElim ongula yEtine okwa ti oyali natango ya tegelela aantu ya ka hogolole sho ya lombwelwa kutya inaya pata.
“Ethimbo ngashingeyi 09h00 ihe inatu tameka natango okuyalula oshoka inatu pewa epitilo sho twa tegelela mboka inaaya mona ompito ohela sigo 21h00,” ta po pi ngaaka.
Ta ti, sigo ethimbo ndyoka ka kwali a mona po omuntu a hala okuhogolola ashike okwali ye ya tegelela.
Omunambelewa gwomahogololo Edmund Nuumbembe pEgululyeengumba koElim ongula yEtine okwa ti oyali mana oku hogololitha no yali pewa epitikilo okutameka okuyalula.
“Ethimbo omugoyi gwa pititha ihe ka tuna po omuntu a hala okuhogolola, aantu ayehe otweya mana po uusiku wEtitatu,” ta ti ngaaka.
Ta gwedha po kutya nonando aanambelewa aakwawo taya lopota ya li ya mono eshonopalo lyoombapila, dhawo okwali dha gwana lela.
Amushanga gwewawa lyaanyasha yoSwapo Efraim Nekongo okwa pititha omushangwa kutya oyuuvu nayi sho omahala gamwe gomahogololo gali ga kolota oombapila dhokuhogolola.
“Ekoloto lyoombapila dhomahogololo okwali lya kaleke oshigwana momikweyo ethimbo e le kaapena uuyelele wa sha wa shoka tashika ningwa po,” ya shanga ngaaka.
Okwa li indile okomisi yomahogololo yi pukulule omapuko ngoka mbala opo wo oshigwana shi tsikile neyinekolo lya kola muyo.
Nekongo natango okwali a shanga kutya esiku lyomahogololo nali gwedhelwe opo oshigwana shi mone ompito yoku hogolola.
Saima Helmut omukalimo gwomOkahao okwa ti omahogololo gwonuumvo ka gali gena uuyuki.
“Oshike oombapila dhomahogololo tadhi pu pomahala mpoka ta pu hogololwa omanga yeshi kutya oombapila odho tadhi longithwa? kashi li mondjila,” ta nyenyeta ngaaka.
Ta ti, oombapila odhali dhina okukala odhindji, dhina okukala po dha pitilila.
Helmut okwa ti omahogololo ka kwali gena okukala gena uupyakandhi ngaashi mboka oshoka oyali yena ethimbo lyagwana okulongekidha kutya kehe shimwe oshili melandulathano.
Omukalimo gwomOkahao Shatipamba Samuel omuniilonga gwomoShoprite okwa ti okwa zi kiilonga teendelele opo a ka hogolole ihe ka kwali a mono ompito oshoka omikweyo okwali omile unene.
“Aakuluntu yokomisi yomahogololo oya ndopa okugwanithapo iilonga yawo oshoka ha kehe gumwe a mona ompito yokuhogolola. Sho anuwa kwa gandjwa ompito esiku lya landula oyindji oya shuna kiilonga,” ta nyenyeta ngaaka.
Ta ti, naya lundulule omalandulathana gawo goku longekidha omahogololo, ta ti nayeyepo nomukalo gumwe goku hogolola.
Shatipamba okwa ti okwa shuna kegumbo inaa hogolola esiku ndyoka.
Aina Emvula gwomomukunda Okando okwa ti, ota gandja uusama kokomisi yomahogololo omolwa omalongekidho gawo.
“Omambamba nga taga tulwa oombapila okwali taga thindilwa oombaapila guudha, shoka shaali mondjila, oshike ngele embamba lyuudha ita pu tulwa ashike ekwao.,’’ ta nyenyeta ngaaka.
Omukuluntu gwopolisi moshitopolwa shaMusati Ismael Basson okwa ti okuza esiku omahogololo ga tameka inaya lopotelwa sha inaashi uka.
Komalungula oshigwana otashi nyenyeta kutya omahogololo gonuumvo oga shololitha oshigwana sho sha kala momikweyo omanga oombapila dhoku hogolola dha kolota.
Sho omutoolinkundana nguka a kala noku toola oonkunkundana moshitopolwa shaMusati aanambelewa yomahogololo oya kala yeli mekwathana ewanawa no ya kala taya gandja omauyelele a gehe taya pulwa.
Esiku lyomahgololo olya e nde nawa ka kele koombaapila dhoka kwali dha kolota pomahala gamwe.