Independent Patriots for Change (IPC) mpitisili gwawo Dr. Panduleni Itula katente mosondaha asi awo tavakarwanesa yitundwamo yomahoroworo goupresidente nondnago zanavenye gomo 2024, mompanguro zokugavera mahoroworo. 

Apa nye kahuyungire kupitira movanambudi, kumwe nonombunga mpatanesi nonkwawo, mupitisili gwawo Itula katente asi ehundiro ngavalituramo pangenderera. 

‘’ Ose kwalituramo nawa nawa asi twahepa kureta ewapukururo monoveta detu dokuhamena kompanguro. 

Ose ngesi kuna kuhundira vatungimo navenye mosirongo, asi vasikame kumwe nonombunga politika dawo tuwapukurure sirongo setu. 

Ose tuna yidiva asi namuvenye muna handuka, unene vadinkantu. Honde kuna kuronda, nye kareni tupu guna mudama, yimo ana kutanta. Munasipundi gombunga ezi, McHenry Venaani, ogu ana kara asi kandindate goupresiedente wombunga zaPDM, yimo ngoso ana kutanta. ‘’ Ose kapi natuhingira tuna mwena tutarerere yininke yangesi. 

Henk Mudge, mpitisili gombunga RP koruha rwendi katente asi nampili ngomu asi mahoroworo nare twagusa kuhamenamo, udigu ou tuna kuyapita momvhura ezi unene, yipo nye asi ose ngono mbunga mpatanesi twahepa kulikwata kumwe turwanese umbondo ou. 

‘’ siruwo esi, twahepa kulikwata kumwe eyi nina kumona asi mulyo unene. Udigu ou kuna kara nye projeka ezi esi natuvhura kurugana mosirongo esi. 

Ose kapi natupulisira eyi yakuhoroka mosirongo yomahoroworo ngayihoroke hena, yimo ana kutanta ngoso. 

Rally for Democracy noProgress hamutjanga ntoni gwazo, Cecil Nguvauva katente asi mbunga zendi kwatokora kuyalipakerera kumwe nononkwawo varwanese eyi yina kuhoroka ngesi, morwa awo kuna kurwanena vaNamibia navenye, ntani udemokoli vahepa kuuwapukurura. ‘’ Ose kuna kukwatesako eyi ana kurugana IPC, mokuza kompanguro. Yimo ana kutanta. Nombunga politika dimwe dina kara asi kuka kukwatesako IPC kuna kara NEEF ntani NUDO. -Nampa