Ovakwashiwana keengaba daNamibia naAngola ova ninga oihakanwa yokuponokelwa, okudengwa nokunyekwa omaliko avo kookalyamupombo.

Ovanamibia ngeenge tava ka tala oilandifomwa yavo moAngola kave li vali meameno ngeenge tava piti keengaba molwaashi ohava ponokelwa kOvaangola moixwa nokulongelwa ominyonena. 

Ovanhu ngeenge tava ka nwefa omahooli kombinga yaShikango eetuwa davo ohadi dengwa kOvaangola ovo hava landifa omahooli paumbudi. Omupopiliko wopolifi moshitukulwa shaHangwena Warrant Andreas Nghiyolwa okwa koleka ta ti Ovanamibia ngeenge va longelwa ominyonena ihava lopotele opolifi molwaashi ova tila.

“Ovanhu ohava dengwa nokunyekwa omaliko ngeenge tava piti koshi yodalate vehe na epitikilo lokuya moAngola,” ta ti.

Omudo wa dja ko keengaba daNamibia naAngola okwa lopotwa oibofa ya yooloka yovOnamibia va yashwa omanga vamwe ova nyekwa omaliko. 

Okwa didilikwa ovapolifi navo hava longele ominyonena oshiwana ngeenge tashi i moAngola shihe na oufemba ile ngeenge sha humbata oinima oyo inai pitikilwa moshilongo.

Nghiyolwa okwa kumaida ovanhu opo va kale tava pitile komuvelo wokeengaba ngeenge tava i moAngola molwaashi ou oo omulandu womondjila hau longifwa.

“Kape na omunhu a ngabekwa okuya moAngola a ka lande oinima ashike ovanhu nave liufe komilandu odo da tulwa po,’’ ta ti.

Okwa weda po ta ti keengaba ohaku longele ovanambelewa tava yakula oshiwana ngeenge tashi tauluka eengaba. “Omunhu ngeenge ota tauluka eengaba ta pitile koshi yodalate moixwa oku na omhito yokuponokelwa koolyamupombo,” ta ti.

Martha Petrus okwa hokolola ta ti oha i koAngola ta ka landa oinima yaye yokulandifa ashike ngeenge ta pitile koshi yodalate oha shakeneke ongudu yovalumenhu va hala oku mu nyeka omaliko aye. “Ohatu kongo ouxupilo ngeenge hatu pitile koshi yodalate ashike kaku na eameno,” ta ti. –fhamalwa@nepc.com.na