Pondondo oitjamurongo ovirihongwa ovahongwa mu va ungurire nawa otjirihongua tjokutunduuza oungetjesa tji tji hongwa i yomiṱiri J. Marenga nozoperesende o-96.

 Ngunda ovivarero atji ri otjirihongwa pondondo ndji ovahongwa mu va ungurire oungundi tjinene nozoperesende omurongo uriri. Wina mOtjiherero pondondo ndji ovahongwa va ungurire oungundi nozoperesende o-33, movirinhongwa avihe o-14 pondondo oitjamurongo, ndji ri kehikehi wina poruveze orutja 12. 

Pondondo oitjamuvyu, otjirihongwa ovahongwa mu va ungurire nawa Otjiherero nozoperesende o-58 ngunda movivarero ava ungurire kehikehi poruveze orusenina orutjamurongo movirihongwa omurongo.  Pondondo oitjahambondatu otjirihongwa tjokutara omambo yotjimariva tjozonganda ovahongwa omu va ungura nawanawa poruveze orutenga. Tjingetjo ngunda movivarero tjimuna pozondondo inḓo zarwe ava ungurire oungundi tjinene poruveze orutjatatu korusenina okuza kehi. 

Ovahongwa o-262 movahongwa avehe kumwe o-768 omba tuurungire kozondondo zokombanda pu inḓa mu va ri posikore yokokambanda ya Maueuozonjanda momarorero omasenina wombura ndji nga tjangerwe mu Tjikukutu. Iho otjihupe, o-52 ava undurirwa kondondo yokombanda. 

Omahandjauriro womaunguriro wovahongwa momarorero maye raisa nao mozondondo oitjahambondatu ngandu koitjamurongo. Mbe ha tuurungire ave ri o-427. Pu mape hee kutja ombe hi na va tuurungire ovengi pu imba mba tuurungire. Ngunda pe na imba mbu ma ku zu va rundururirwa kwarwe. Ozoperesende zaimba mba tuurungire o-457. Ovahongwa ovakazona omba tuurungire ovengi pu imba ovazandu nozoperesende o-49 ngunda ozoperesende zovahongwa ovazandu mba tuurungire ave ri o-43. 

Pondondo oitjamurongo Nicola Mbaisa eemuhongwa omutenga ngwa ungura nawanawa nozongombe o-28 nandarire kutja ketambo re maku kongorere Kauu Muriambihu wina nozongombe tjingezo na Uasenina Marenga nozomgombe o-27 ngunda Vekapahaije Mbahepa ae ri poruveze orutjatatu nozongombe o-27 wina. 

Pondondo oitjamuvyu Uetuasapi Kamuro ongwa ungurire nawanawa nozongombe o-45 na Mupangure Tjinae wina nozongombe tjingezo outjavari ngunda Ngajozikue Tjituka nozongombe o-39 outjatatu. Pondondo oitjahambondatu Jekumba Murise ongwa ungurire nawanawa nozongombe o-44 na Rejoice Hengari nozongombe tjingezo outjavari na Kunaje Muundjua outjatatu nozongombe o-43.