Oritjavari ngurova Omuhaamise wOvihavero Vyotjirata tja Namibia Tjomatoororero, Onongo Elsie Nghikembua, otja tjivisire ovivarero ovisenina vyomatoororero wOuperesindenda nowouṋepo wOmbongarero yOtjiwaṋa.

Kutja omuvarekwa wOswapo ya Namibia, Netumbo Nandi-Ndeitwah, oomutoororwa otjOperesindenda ya Namibia, ngunda Oswapo atji ri otjira tji matji honaparerepo mOmbongarero yOtjiwaṋa novihavero ovingi o 51. 

Movengi mba munikire pomatjivisiro nga Operesindenda ya Namibia nai ndji ri motjihavero, Onongo Nangolo Mbumba, nomuurikwa wOswapo ya Namibia kouperesindenda, Netumbo Nandi-Ndaitwah, nOmunane wOafrimative Repositioning, ousupi OAR, Job Amupanda. Ngunda ovengi vovanane vovira vyarwe vyoporotika mbyari norupa momatoororero nga avari ave hi nokumunikira po. 

Kutja ngahino tjandje va ṋiṋinwa ouingi wovandu poo ngahino kapu va ri kaparukaze. 

Tji tji he ri otjiṋa otjikumise ngunda oruuma ronyengo notjavivi muvyo ohunga nomuano otjirata tjomatoororero mbu tja nanene omatoororero nga aru hi ya wa pehi. 

Tjinga tjiva vovira mbi nai amavi ripurire kokupirura ovivarero vyomatoororero nga tjiva vyavyo amavi munu kokutja ovivarero mbi kavi sere okuyakurwa kaparukaze nomatoororero nga maye sokukautisiwa komautiro mena roviṋenge ovihatjata mbya karereko momakayendero womatoororero. Mu mu nOindependent Patriots for Change, OIPC, oyo ndja raisire rukuru kutja kai nokuyakura ovivarero vyomatoororero nga. NOlandless Peoples Movement, OLPM, ndji mai tja ya sere okuutururwa.

Ngunda ape ri nao nandarire kutja pomatjivisiro wovivarero vyomatoororero omasenina omunane wawo i umwe wovanane vovira vyarwe pendje nOswapo mba munikire puyo, Amupanda ma raisa omatoororero nga otjomahakutuke na wina otjomehina ouwa.  

Otja kehungi re ku nonganda yozombuze ya Namibia indji Onamibia Press Agency, ousupi Oonampa. Katjisupi kombunda yomatjivisiro wovivarero ovisenina Oritjavari ngurova. 

Otja kondjivisiro yovivarero ovisenina Oswapo nambano mOmbongarero yOtjiwaṋa mai kara novihavero poo ouṋepo o-51 weraka muyo tjikweya kokutoorora. Mbi ri ovihavero o-11 kehi ya imbi mbi kara navyo nai.  

OIPC i novihavero o-20 ondji mai pingene OPDM, ndji kara novihavero o-16 posi ya nai ndja munu ovihavero o-5, otjotjira otjipirure. 

Ngunda poruveze orutjatatu ape nOAR novihavero o-6.