Elelo laUkwanyama ola hokolola ta li ti ola hafa eshi moshitunda shaUkwanyama mwa dja omuhoololwa Presidente womukainhu Netumbo Nandi-Ndaitwah lwoshikando shotete.

Omupopiliko welelo laUkwanyama Andrew Naikaku okwa ti Nandi-Ndaitwah okwa eta ondjokonona ya fimana moshitunda shaUkwanyama noshoyo moshilongo. Omwedi wa dja okwa li kuna omahoololo opaUpresidente noshoyo oilyo yomutumba wopashiwana.

Eengudu 15 da yooloka dopapolitika okwa li da kufa ombinga momahoololo.

Ongudu Swapo oya findana omahoololo noipundi 51, omanga ongudu yoIPC oye ya ponomola onhi-2 noipundi 20 ta ku landula AR a dja mo noipundi ihamano.

Omupresidente Nangolo Mbumba okwa pitika omahoololo a ningwe omafiku aatatu molwashi ovanhu vamwe ka kwa li va hoololo mefiku olo limwe kwa li la tulwa po lokuhoolola.

Naikaku okwa tanga omuhoololwa Presidente ta ti omukainhu e hole ombili ye oha longo pauyuuki. “Ota dulu okuninga Omupresidente shaashi okwa kala ta wilike nawa keeministeli da yooloka. Nandi-Ndaitwah oku na olukeno noshiwana,” ta ti. Okwa ti oshilongo oshi li momake awa molwashi otashi ka mona Omupresidente ehe na okatongo, omukainhu e na elandulafano noukumwe.

“Otwa hoolola omuleli ou ta kandula po omashongo aa taalelwa koshiwana. Otwa teelela omauwa aahapu pefimbo Nandi-Ndaitwah ta ka wilika oshilongo,” ta ti.

Naikaku okwa ti Ohamba yaUkwanyama nayo oi udite ehafo netumba eshi moshitunda shaye mwa dja omukainhu ta ka ninga Omupresidente.

Oshivike sha dja ko pefimbo Swapo kwa li a ninga oshivilo shokutyapula efindano lomahoololo, Nandi-Ndaitwah okwa popya ta ti okwe li longekida okuninga Omupresidente. Okwa lombwela oshiwana opo shi xulife po okupopya oipupulu kutya ke na oukolele. Okwa li ta popi e likwatelela komunailonga woNBC TV Anna Nikodemus ou a ya koTV yaSouth Africa ndele ta ka popya kutya Nandi-Ndaitwah vati okwe li denga po lwoikando ivali pefimbo ta ningi oikonga yomahoololo.

“Ame ondi na oukolele, ohandi dulu okuninga Omupresidente. Ina mu popya vali omahokololo oipupulu. Oshi lengifa omunhu tai kondje yoshilongo ta ka popya nge kutya ode li dange po oikando ivali,” ta ti.

Mopaife ngaha Anna Nicodemus okwa kufwa moilonga pokafimbo.

Eengudu domilameno ota di nyenyeta kutya ekufo moilonga laNicodemus ka li pauyuuki.

Nandi-Ndaitwah ota ka nangekwa moilonga yaye yoUpresidente momudo tau ya. Omudo tau ya Omupresidente mu pe ota ka ulika yoo vali eeminista dipe koikondo ya yooloka.

Nandi-Ndaitwah ota ka ninga Omupresidente omutitano waNamibia, ye oku li omukainhu wotete.

Efindano laye oli li onghundana iwa kovakainhu molwashi ove udite etumba linene. – fhamalwa@nepc.com.na