Khoekhoegowab, Languages

Bukalos ge N$3 miljunmarisa ǁanain hâ !hūde xu doe kais !aroma omaride  mātareǂuis !aroma ge !khō!oa

2024-12-112024-12-11By Albertina Nakale
Bukalos ge N$3 miljunmarisa ǁanain hâ !hūde xu doe kais !aroma omaride  mātareǂuis !aroma ge !khō!oa

BUKALOS – ǀAwemā!nans, Bukalos !Garo!āǂgaeǂguis dis ge N$3.1 miljuns marisa mādawa-ams ase ge !khō!oa, ǁanǂgāsaben hîa ǁ-în di ǂhunuma ǁan!khaina xu ǁgauǂuisa ǀkhara ǁanǁguib ǁga nî doebēse in, omkhâisens ǀaweǁguigu !aromana nî mātareǂuise.

 ǀAwemā!nans ge 39 omaride ǀnai nî mātareǂui tsî !gauhâ 11 omaridi ge ǂhanusi ǁhōn tamas ka i o ǂkhanin ga a dītoahe ǁaeb ai nî mātareǂuihe. Bukalos ǀawemā!nans di aiǂnû-aob, Simataa Mubondab ge nē ǂanǂansa ǁîb di ǁkhawa aiǂnûaose ǂoa ge wekheb !nâ ǁhûimâihes khao!gâ ge dī. 

“Mātareǂuidi ge noxopa ai!gûgaru, ǁnāpan !nāsa !gôab di khoena ǀnai a mātareǂutoa tsî !gauhâ !gôab dina ǂhanusi ǁhōn tamas ka i o ǂkhanin ga dītoahes khao!gâ ǁîn di !âga nî hōse. 

Mubondas ge Annoscah Mutumuswanos xa !nakaǂnôabahe. Mubondas tsî Mutumuswanos hâra ge hoatsama a Swapo !nans di tsî Katima Mulilos Maxastarati, Davy Kambindab xa ge ǀnauǂgāhe.

Bukalos ǀawemā!nans ge aiǁgause ǁîn ǀaweǁ-guib !nâ 300 !hū!âde ǂamhōǂgāde ra !khō!oan tsî sîseno khoen !aroma mā, !gae-audon ǂgaemâi!khaib tsî !gâitsâsens ǀhuru!hanab tsîna nî ǂnuwi. ǀAwemā!nans ge !hū!âde ǁguiri-aona ge mā, Haamco Investments CC nî 162 omde omaise. 

Les Trading & Enterprises CC ge ǁîs tsîna !hū!âse ge !khō!oa kai daob xōǀkhās kai ǁamaǂharugu!khaiba nî omse. 

Katima Mulilos !Garo!ā ǂgiǂgosi ǀawemā-aob, WardenSimushib ge ǁguiri-aon tsî ǂhanub !auga mâ ǂnûiǂgādi ai ǂgansa ge dī, Bukalo !Garo!ā ǀAwemā!nans ra mā !ēde sîsenūsa, nēs a ǁkhowa-am Chobe !Hū!nāsi ǀGuru!hanab tsî Victoria Falls ǁga garu daob diba amaga. Bukalos omkhâisens !ân diǀguis ge !khauǁnuib ǁai!khaib hîa ǀoasase mā ra sîsenna.

 “ǂKhawusase ǁgam-e !khō!oas ge ǂâiǂhansens ase ge ī i, ǁanǂgāsaben ǂauna -gam-e ǁāsenūs tsî ǂûsâis !aroma hō tama gere īse, xawen ge ǀawemā!nans tsî NamWaters hâra ssenǁareb !nâ-ū nē mâi!gâhe,” tib ge ge mî. 

Mubondab ai!â gere mîsa !oas ge ǀawemā!nansa N$900 000 ge !khō!oa, Build Together projeks omde omtoas !aroma. ǀAwemā!nans ge ǀgaisa ǁgoaǂuis ǁanǂgāsaben !khō!oan ra !oabade mātare tamas disa ūhâ. 

ǀHaehe rasa !oan ge ǁanǂgāsabena ǁaupexa N$100 000 mâǂoahâ surudegu disa ūhâ.Mubondab ge ǀnîkhamikō !gomsin ǀkhan ǂnôa, xawes ǀawemā!nansa ǀhû-ǁarebese ǀhûhâsib ǀkha oresa hōsa ra ôa-am ti ge ǀamǀam.