Okakadona keedula 16 oka tambuliwa moshipangelo konima eshi vati ka mwa omiti da pitilila nelalakano loku li dipaa shaashi ka tanguna nomulumenhu wako.
Ota ku hokololwa kutya okakadona aka oke na eteelelo leemwedi nhatu.
Oshiningwanima osha ningwa oshivike sha djako komukunda Karangana koshitukulwa shaKavango West efimbo longula meumbo lavo.
Omupopiliko wopolifi koshitukulwa shaKavango West Chief Inspector Rambert Muronga okwa hokolola ta ti okakadona oka tameka okukunga molwashi oka mwa omiti dihapu. Okwa ti opolifi oye li pyakidila nokukonakona oshikumungu eshi. Oshiningwanima shikwao, omukulupe weedula 73 okwa kwatwa onghonga pefimbo a hangika ta ende moixwa.
Omufekelwa oku na omido 35 nokwa kwatwa po efiku tuu olo a longa oshimbuluma.
Oshingwanima osha ningwa komukunda Ndombe koshitukulwa shaKavango West efimbo lomutenya. Ota ku hokololwa kutya omulumenhu ou okwa nukila omukulupe ndele te mu ningile omatilifo kutya ote mu dipaa.
Opolifi oya ti omukulupe okwa dengwa pedu noku longelwa omunyonena wopaixulo.
Ota holoka momhangu nena nota pangulilwa oshibofa shekwatonghonga.
Oshiwana osha kumaidwa opo shi kale sha tonatela ovakulupe va ende novatolinateli molwashi ovakulupe navo ova ninga oihakanwa yokukwatwa onghonga.