Kupapara yirugana kapi yina kara tupu asi nzodi moNamibia, nye kuna kara asi ndiro unene mokuyirugana nayenye oyo. Namibia kuyipakerere kutunda momvhura zina puko, kuna kara nosivaro sava vana pilire yirugana wokusika ko 34% anonye vadinkantu vana pili yirugana kuna siki nye ko 45%.
Mukaro ogu nye gamwene nakufa Presidente Hage Geingob asi kuna hingire koboma zina hara kucuka. Nye nampili ngoso, yirugana yakara asi yomosirongo kuna kumoneka nakauke nakauke, omu yina kumoneka paekonomi kuna kuhara kuwapa morwa yirandwa nayenye kuna kuzeruka pontambo zouzuni, unene ngwendi Uranium, Copper ntani Gold, ntani oyipakerere nye kumwe nehunguvaro vana kara vantu mokutanta asi tuna gwana maholi ntani green hydrogen pangesefa.
Eyi kuna kuraeta nye magano peke kwava vana kufgazara asi takuwiza yirugana ndi asi yiwizamo yetu tayikavhuka unene nokugwana yirugana nako takurerupa moNamibia omu yina kara asi kuna kumoneka nawa. Eyi kupura nye yimaliwa yoyinzi yina kara asi ava vana kupapara yirugana kapi tava kara nayo. Ugendero, apa nye katu huyungire novapapali yireugana mositata saVenduka,m ugendero kuna kara asi simwe sosidigu nsene asi muntu ogo kuna kupapara yirugana.
Eyi kuna kara asi nepu asi CV ono ziwapayike, kufukisa, ntani kuyituna email nayimpapira nayinye vana pumbwa, ano ogo nye ana kupapara yirugana gahepa nye kuza komapuragero oku nakamoneka mwene. ‘’ Ame kuvhura kuzumbanesa mezuva yimaliwa yokusika ko N$200 mokupapara tupu yirugana. Yimona tupu ngesi, mokuza ntani mokutengura evango limwe tupu nare onozumbanesa N$50. 00.
Eyi kuna kara tupu asi ehundiro limwe tupu, omu nye muna pilire kuhamena nondja ndi airtime eyi nayi pulisirange asi nitume yimbapira yange ko email,’’ yimo ana kuhuyunga mupapali yirugana gumwe ana pilire kuhara asi Edina lyendi vahali tumnura.
Eyi yina kara nye asi kapi yina gwanene, nsene nye vana kutura pendindiro, wahepa kutengura yikando kupitakana yivali, yipo asi dogoro ngava gwane asi yilye van ape sirugana oso. Ogu nye nage kakumbwilireko mokupapara yirugana, Christa Nekwaya, ogu kagwene sinkwa ntani yirugana kokampani zimwe yokukalironga sirugana, katente asi nokampani donzi kuna kupura udivi woge wakara nawo mosirugana oso. ‘’Kampani kuna kupura nomvhura ntano ndi murongo wakara noudivi wosirugana oso.
Vahepa kukara tavadiva asi vamwe kuna kumana elirongo ngesi makura nawo vana hara yirugana, yimo ana kutanta nokugwedako asi vapapali yirugana kuna kuhepa unene morwa ana hara vamumone. Mokufaturura vamwe vawo kuna kutanta asi kuvhura kuzumbanesa ndi kuruganesa yimaliwa yokusika ko N$1000 ndi N$1 500 mokwedi mokupapara yirugana. Morwa eyi kuna kuyiretesapo yeeyi vatulisapo asi yirugana wahepa kuturamo mahundiro, vahana kutara asi yinke novhura kurugana morwa yooyo vatlisapo.
Ogu nage kahuyungire kosayitunga zaNew Era hamutjangantoni gombunga zovarugani zaTUCNA Mahongora Kavihuha katente asi pwahepa kuwiza ewapukururo ngendeseso zokupapara yirugana. Mokugwedako Kavihuha katente asi mavango gamwe kuna kuninkisa kugwana yirugana yidogope unene unene nokampani dakara asi depangero. Nokampani dangesi ngano yido nye dina kara asi ure kugava yirugana nye yiyo vana kuvatura vakare hena pelizuvho vahana kuvakutilira mosirugana. Sinonena kampani zaCenored varugani wokusika ko 60% pomalizuvho tupu gomasupi vakara.
“Ose kuna kupura mbongarero zanavenye zaNamibia varuganese veta zo 44 omu navatulisapo yimaliwa ndi fund ndi sikesa sava wokupira kurugana ngwendi moomu vatulisapo veta zovarwi vanare zomosintokorwa 2 zomo 2008 eyi yaninkisa varwi vanare vagwane yimaliwa vayiruganesa eyi vana kuteta komutero gosirongo ano ava wokupira kurugana vahepa nye kuvafuta yimaliwa yokusika ko N$250 000 pwarumwe tupu yipo varugane noprojeka dopaumwene.
Yitundwamo yantani yoministeli zovarugani kuna kutanta asi 12 000 vantu wokupapara yirugana kwalitjangesa ko NIES posiruwo nye somvhura 2023/24 meyereko simaliwa momvhura. Mosivaro nye nasinye oso, kuna kara tupu wokusika ko 1 350 vagwanena yirugana.
Sinzi sovanapolitika ntani vava valiroingera ekonomi kwapura asi nsene ekonomi lyosirongo kuna kukura yimo ngoso noyirugana yakuvuka. NIEIS kuna hara asi nkenye evango ndi kampani zina kutulisapo sirugana vahepa kukwama veta ezi zakarapo. Kutunda tupu apa vazitura paveta, mo 2013, NIEIS kwakara asi kwal;ituramo unene mokupaparera vantu yirugana mwaza sirongo mudima. NIEIS kwagwanekedesa vantu wovanzi pamundindinda nonombunga dokulisiga siga, omu valikida asi awo nawa nawa kuvhura kupaparera muntu yirugana momarupe gokulisiga siga.
–ebrand@nepc.com.na