Auleria Wakudumo 

Okakomisi komahoololo oka yandja oilongifo oyo ya li ya longifwa pefimbo lomahoololo oupresidente osho yo omutumba wopashiwana mwa kwatelwa omawi a valulwa kovakalelipo veengudu da yooloka opo va talulule oidjemo yomahoololo mOvenduka onghela. 

Ovakalelipo ova dja keengudu ngaashi IPC, LPM, NEFC, PDM, noNEFF va kwatelwa komesho kovanambelewa vokakomisi komahoololo. 

Eshi osha dja konima eshi nokutalulula omhangu yopombada ya dimina noya yandja epitikilo keengudu dopapolitika odo da tula mo eindilo opo di talulule oilongifo opo oilongifo i talwe omafiku 18 no19 Desemba neudo. 

Eengudu da li da twala okakomisi komahoololo oLandless People’s Movement (LPM) osho yo ongudu yoIndependent Patriots for Change (IPC). Eengudu edi oda li da holola eudonai lado kombinga yanghene vati omahoololo inaa enda pauyuuki unene omafiku a wedelwa osho yo oilongifo ngaashi eembapila noikwatelwa yeembapila inai wana peenhele dimwe domahoololo moitukulwa ya yooloka. Ongudu yo-IPC oyo yali ya tula mo eindilo tete nongudu yo-LPM tai shikula ko okuyandja omakemo ayo komhangu yopombada. 

Eengudu edi oda li da pula di pewe omwaalu wovanhu va hoolola, eembapila odo inadi tambulwa ko, noipundi oyo ya monika keengudu adishe ponhele keshe yomahoololo nomhangu oya yandja epitikilo opo aishe ya pulwa keengudu edi i talululwe. 

Ongudu yo-IPC no-LPM oya li ya holola kutya kakele koilongifo ya longifwa pefimbo lomahoololo ove udite kutya omafiku a wedelwa omahoololo kae li pamulandu woveta nomupresidente ita dulu okuwedela omafiku omahoololo. 

Momukanda wavo, ova holola omukulunhu wokakomisi komahoololo Elsie Nghikembua ongomunyamukuli wotete, Omunambelewa akula Peter Shaama ongomunyamukuli mutivali nOmupresidente woshilongo, Nangolo Mbumba onga omunyamukuli mutitatu nOhahendedjai Festus Mbandeka onga omunyamukuli wa xuuninwa. 

Otava pula nee vati omunyamukuli wotete Nghikembua nomutivali, Shaama opo va nyamukule omikanda mbali da shangwa keengudu nokuyandja oyo ya tumbulwa momukanda. 

Kakele ko-IPC no-LPM, eengudu dihapu oda anya okutambula ko oidjemo yomahoololo nadihapu oda holola kutya otadi ka katuka onghatu okutwala okakomisi komahoololo komhangu. -wakudumoauleria@gmail.com