Omasiku ashike omulongo nasha ga kondo omwedhi gwaDesemba ngoka taga ithanwa omatango omanene, ihe oomwenyo dhaantu dha kana miiponga yiihauto odhi vule omasiku ngoka.
Kakukutu komatanga gwopolisi Joseph Shikongo okwa thindi omuthindo paahingi yoohauto ya hinge nuukeka osho wo nethimbo opo ku yandwe iiponga yomoondjila, unene mboka taya hingi oondjila oonde. “Oondjila odhu udha aatalelipo yu uka kiitopolwa ya yooloka moshilongo, onkene otashi kala omukalo omwaanawa ngele kehe gumwe ta hingi nuukeka,” ta kumagidha ngaaka.
Ta kumagidha wo oshigwana kutya, mboka taya ka talela po aakwanezimo yawo kiitopolwa ya yooloka, naya longithe nawa omandhindhiliko gomoondjila okuyanda iiponga hayi holoka unene pethimbo ndika lyokili. Shikongo okwa li a kunkilile aahingi yiiyenditho kaaya hinge ye li kohi yomalovu nenge ya loloka.
“Uuna wu uvite wa loloka vululukwa po e to tsikile nale, nenge mu yakulathane okuhinga. Uuna ayihe mbyoka ya gwanithwa po iiponga yomoondjila otayi shonopala,’’ ta ti ngaaka.
Okwa ti okuhingilila hako okuthika, ngoka a endelela na hinge kuyele ye a thike pethimbo.
Nonando to hingi kashona owu na okuthika ashike, omolwegameno lyoomwenyo wa humbata mohauto yoye osho wo dhayakweni ye li wo moondjila.
“Omimvo dha piti, pethimbo ndika lyomatango omanene, oyendji oya kanithile mo oomwenyo dhawo, ihe olundji ohashi holoka kokwaalandula omandhindhiliko gomoondjila,” Shikongo ta ti ngaaka.
Shikongo okwa ti opolisi yaNamibia oshilongo ashihe oya ilongekidha okulwitha iimbuluma pethimbo ndika, onkene itaya ka pitika nando omuntu ta ka konda nenge ta ka yonagula oompango adhihe dha tulwa po.
Ehangano lyo-MVA Fund nalyo olya kumagidha oshigwana shi hinge nuukeka. Lya ti ondjila otayi longithwa kaantu ayehe, onkene oshinakugwanithwa sha kehe gumwe, okugwanitha po omandhindhiliko gomoondjila nokuyanda iiponga yombaadhilila,’’ taya kumagidha ngaaka.
Ehangano lyo-MVA, okupitila kepandja lyawo lyomalungula olya li wo lya shanga kutya uuna oshiponga sha holoka moondjila, kehe gumwe okwa manguluka okudhenga konomola yopolisi 10111 nenge MVA 9682. -vkaapanda@nepc.com.na