Ouhonapare wOmbazu wOvaherero, OOTA, kehi yOmbara Otjitambi Onongo Mutjinde Katjiua, mau yandja oruveze ku ingwi ngwa toororerwe Otjoperesindenda ya Namibia, Nandi Netumbo-Ndaitwah.
Okuṱuna imbi mbya pirama na mbya pita mondjira mongondjero notjihungiriro tjOtjisuta tjOtjiṱiro Otjindjandja tjOvaherero nOvakwena ku nEhi rOvandoitji. Ovaherero Genocide Foundation (OGF), nduri orutu Rootanduungura nongondjero yOtjisuta, maru tja nao. Amaru zirire komambo ngari mongoramambo ndji pita motjiveke atjihe indji Oconfindande yomayuva omayuva tji ye ri 15 ku Tjitarazu, Oritjatano nda zuko, ngandu kerero tji ya ri 19 ku Tjitarazu.
“Ovaherero mave hambanisiwa i yOuperesindenda wa Netumbo…OOTA ya kara nomakurakuriro otjimbwandangoma okupukata Nandi-Ndaitwah movihungiriro vyOtjiṱiro Otjindjandja.” Ongari omambo wotjiuru tjomatjangwa wongoramambo ndji.
“Tu nomaundjiro kutja eye (Nandi-Ndaitwah) tja hiti momberoo (yOuperesindenda) ma tara neho rarwe rapeke kOtjiṱiro Otjindjandja nondjuriro yOvaherero mena rokutja ovakazendu ve tara peke komapu nge ri po,” Oconfindande ya tjangere nao tji ya hakayenene nOmbara Bethold Tjiundje kombunda yehungi re Oritjavari nda zuko mOtoasisa tja Mongua pomatwirisiro wOnganda yOmbwikiro yOviuṋe Vyomazemburukiro wOmbara Otjitambi Hosea Kuṱako nombindi yomuvanda wOtjimungunda nai ndja tungwa korutjato rwouye wakandinondi i yohoromende. Owo nge he ri omambo ngari mehungi ra tjiundje.
Posi ya OOGF mai tja omatjangwa wOconfindande nga nge ha ri wehungi rOmbara Tjiundje omapukise. Tjinene inga ngu maye tja twa po ayo OOTA ya kunguzuka okuzapo ponguramene yayo ohapo motjihungiriro tjohoromende ya Namibia nongwao yEhi rOvandoitji. Ondimwa yongurameno ndji ndji ri kokutja ovaihamisiwa mave sokuruhungirira oveni. Ndji ri ongurameno ndji ha sere okuveririsa OOTA onavita nohoromende ya Namibia.
“Ngunda amatu kara amatu kwekurura omuano horomende nai ndji ri po mbu i tjinda otjiṋa tjOtjisuta, twa rongera okupa Operesidenda Ondoororwa, Nandi-Ndeitwah oruveze rokutara nokuṱuna omauhasemba woruveze orure inga,” OOGF mai tja.
Nai weza kokutja otjihorera tjOOTA okuzerira po Operesindenda ndji mai yaruka motjihavero ouṋingandu okuraisa omaundjiro wayo okukara notjihungiriro otjitunge nayo nokuyenda komurungu nungwari ka ku riyandja poo okuzapo pongurameno yayo.