Auleria Wakudumo
Omulumenhu weedula 32 okwa xulifa eshi e lihumba ketenda laTelecom. Oshiningwanima osha ningwa Omaandaxa popepi noshitaasi shopolifi lwopo 20h27.
Oshiningwanima osha kolekwa komukulunhu koshikondo shokukonaakona oimbuluma moshitukulwa shaShana, Deputy Commissioner Frederick Ndjadila. Nakufya okwa tongololwa oye David Ndakoko, omukalimo womOlunho mOndangwa.
Ndjadila okwa holola ta ti nakufya ota feekelwa a kala ena ounghundi wopamadilaadilo.
Oshiningwanima shikwao, omukulupe weedula 68 okwe li tuwa komukulukadi waye a xulifa meumbo. Oshiningwanima osha ningilwa momukunda Iikuku moshitukulwa shaShana, sha ningwa Omaandaxa lwopo 06h00.
Nakufya okwa tongololwa oye Wilbard Jamwale. Jamwale vati ota feekelwa a li a kolwa okudja koundingosho nokwali a fikila a nangala pondje yonduda yaye lwopo 22h00 opo eya oku li tuwa komukulukadi waye a xulifa.