ONGWEDIVA – Oshiningwanima shitilifa shomunambelewa wopolifi omulumenhu weedula 44 Kornelius Nghitewapo a kana oule wodula ashike fiyo onena kape na ouyelele kutya oku li peni.

Ovakwapata vaye ova ninga eenghendabala dokukonga omupolifi ou ashike ina monika fiyo paife.

Umwe womukwapata waye Junias Nghitewapo okwa koleka ta ti Kornelius okwe li xulwa okumonika momafiku 29 Desemba 2023.

Otaku hokololwa kutya omupolifi ou okwa li ha di mOshakati nokwa li ta longele poshitaasi shaShakati.

“Otwa limbililwa shaashi katu shi ngeenge mumwamememati oku li momwenyo ile okwa xulifa. Otwa ninga yoo vali eenghendabala doku ya komavalulilo ombaanga yaye opo tu tale ngeenge oshimaliwa shaye ohashi kufwa ko ile oko shi li,” ta hokolola. Onghee okwa ti nomavalulilo ombaanga yaKornelius otaa ulike kutya oshimaliwa shaye ihashi kufwa ko nombaanga yaye ihai longifwa vali.

“Paife omavalulilo ombaanga yaye okwa pata manga opo tu tale ngeenge otai kombaanga e ke ma patulule,” ta hokolola.

Junias okwa ti opolifi oya ninga eenghendabala doku mu konga momilamba domeva nelalakano lokutala ngeenge pamwe okwa wila momeva.

“Ohatu lipula kutya pamwe okwa ya kondje yoshilongo molwaashi otwa nyengwa paife oku mu mona,” ta ti. Okwa weda po ta ti ongodi yaye kai li momhepo otai ulike ye lixulwa okulongifwa momafiku 29 Desemba 2023.

Kornelius okwa dile komukunda Omundudu moshitukulwa shaHangwena.

Okwa li a teelelwa okukala a tameka oilonga momafiku 8 Januali 2023 ashike koilonga ina ya ko.

Oshiwana otashi indilwa kwaau e na ouyelele opo shi kwatafane keenomola dongodi 0812090336 ile 0812045696.

-fhamalwa@nepc.com.na