OKALONGO – Ovanangeshefa tava landifile momapandaanda kOkalongo otava ka tungilwa omatala nelalakano lokulandifila oinima yavo. Okalongo oke li moshitukulwa saMusati nota ka ende nokuxuma komesho molwaashi okwa tungwa eefitola da yooloka.Minista womangeshefelo Lucia Iipumbu okwa patulula pambelewa oilonga yokutunga omatala oshivike sha dja ko. Ovanangeshefa, ovaleli vopamifyuululwakalo novakalimo va dja komikunda da yooloka okwa li va holoka nehafo kefiku lepatululo loilonga yokutunga omatala. Okalongo oke na ovanhu tava landifa komapandaanda molwashi kkpe na omatala.
Minista Iipumbu okwa ti osha fimana ngeenge ovanhu tava landifile momatala molwaashi itashi ulike efano liwa ngeenge omunhu ta ende a humbata oikulya komutwe ta landifa. Okwa popya ta ti omatala otaa ka etela oshiwana omauwa ngaashi oyuuyemo nosho yo eemhito doilonga nokuyambula po oshikondo shoipindi modoolopa.“Ouministeli wetu otau twikile nokuxwaxwameka nosho yo okuyambidida ovanangeshefa va shona,” ta ti. Okwa weda po ta ti oshikondo sheengeshefa osha fimana molwashi otashi yambula po eliko loshilongo.“Ovanhu nava twikile noipindi opo va mone oyuuyemo nokulwifa ondjala,” ta ti.
Iipumbu okwa ti ngeenge modoolopa mu na omatala otashi nane ovatalelipo opo va ye komatala ve ke li landele oilandifomwa yOshiwambo.
Okwa kumaida oshiwana mwa kwatelwa ovanyasha opo va kale tava longifa ounongo wavo okueta po oihongomwa yOshiwambo.
“Ovanhu nava topolelafane omayelele nghene ve na okuyambula po eengeshefa davo,” ta ti.
Okwa lombwela oshiwana ta ti ouministeli wavo ohau yambidida ovangeshefa vashona ngeenge va pumbwa omakwafo. “Oshiwana nashi talele po eembelewa detu opo shi pewe ouyelele kombinga yomayakulo ta yandjwa kouministeli wetu,” ta ti.
Selma Vaino omukalimo womOkalongo noku li ta landifile koshi yomuti okwa pandula eshi tava ka tungilwa omatala. “Paife ohatu ka landifila ponhele iwa yoshinanena.
Ohatu landifa oinima yetu twa manguluka,” ta ti. Okwa ti oilandifomwa yavo itai ka lokwa vali kodula shaashi otava ka landifila momatala a tungwa nawa.
-fhamalwa@nepc.com.na