WINDOKO – Muatuli mwa Khuta Yetuna Hosea Angula uisize kwapili taba teñi kopano ya Independent Patriots for Change (IPC) ilwanisa linepo za liketisa za naha za 2024. Angula nalemusize kopano ya IPC ni ba ba zeka ni bona kuli taba ika kuta mwa khuta kuto zekiwa mwa mazazi akoto fiwa la 03 Yowa 2025.
Bayahi banaha Namibia neba fitisize liketo za bona kuzwa la 27 Njimwana kuisa la 30 Njimwana 2024 kasamulaho katengo kakabona za liketisa mwa naha (ECN) neka ekelize mazi akubota, bakeñisa lisitataliso zekulubelwa zecwale kakusaba teñi kwa mapampili akubotela kwa libaka zeñwi zakubotela.
Kopano ya IPC, iyemelwa ki Dirk Conraide, ibata kuli Khuta Yetuna ipatalaze linepo za liketisa zakuketa mueteleli wanaha za 2024 kuba zesina tuso ni zene sika ezwa isi kamulao. Kopano ibata hape kufa taelo yakuli liketisa zakuketa mueteleli wanaha likutele kakulatelela Mutomupuso wanaha Namibia ni Mulao obona zaliketisa wasilimo sa 2014.
Kuekeza famuzeko oli mwa khuta yetuna, kopano ina ni taba yeñwi mwa khuta yebona za liketisa, teñi balwanisa linepo za liketisa za ndu ya milao za 2024. Taba ifa pila muatuli Hannelie Prinsloo mi ika utwiwa la 15 Sope 2025.
“Linepo za liketisa za silibonda zetezi mafosisa amatuna hahulu, mane neli tokwisize bane baswanela kubota liswanelo zabona. Kubala linepo kwa liketisa za silibonda nekutatekile kapilipili kasamulaho akukwaliwa kwa libuka zakubotela kanako ya 21h00 la 27 Njimwana kulatelela kalulo ya buketalizo ya Mulao,” mueteleli wakopano ya IPC Panduleni Itula nabulezi mwa manzwi ahae nane afitisizwe mwa khuta.
Itula uhatelela mwa mapampili afitisizwe mwa khuta kuli liketisa “neli tezi mafosisa kai ni kai, kacwalo neli loba liswanelo zamutomopuso.” Ubulela hape kuli palo yabatu bane ba botile la 27 Njimwana haizibahali. Babana ni kuikalabela mwa muzeko kungelezi cwalo ni Mueteleli wanaha Nangolo Mbumba, katengo ka ECN ni muzamaisi wakona Peter Shaama. Hamoho cwalo ni likopano zeñwi bala ezwi kufisa manzwi abona abuikalabelo pili la 31 Sope 2025 lisika fita kale.