Ovalumenhu vavali otava holoka nena momhangu yaEenhana molwashi va vaka oikombo ivali nelalakano lokukalandifa ombelela.

Oshiningwanima osha ningwa Olomakaya komukunda Eembaxu popepi nodoolopa yaEenhana, koshitukulwa shaHangwena. 

Oikombo oi li pongushu yoshimaliwa eeN$3000, nombelela oya kufwa po kopolifi.

Okwa didilika omikunda da dingonoka odoolopa yaEenhana ha ku lopotwa oimbuluma yovanhu tava vake oimuna unene oikombo.

Ovanhu tava vake oikombo molwashi ova hala okukalandifa okapana nombelela.

Omupopiliko wopolifi koshitukulwa shaHangwena Warrant Andreas Nghiyolwa okwa hokolola ta ti ovafekelwa ova hangika nombelela i li mokatololi ashike ova podopa okuyandja omikanda kutya ombelela oya dja peni.

Opolifi oya hokolola tai ti omunhu ngeenge okwa hangika nombelela yoshimuna ile aumbata oshimuna ndele kena sha omikanda odo da di ulike kutya oshimuna osha dja peni ota kwatwa po diva.

Oshiwana osha kumaidwa opo shi kale alushe shina omikanda doimuna molwashi ou oo omulandu wa tulwa po koveta.

Omufekelwa umwe oku na omido 30 omanga umwe oku na omido 32.

Oshiningwanima shikwao, omulumenhu womido 32 okwa kwatwa po konima eshi a yasha  omukainhu momuta wanangongo medimo.

Oshiningwanima osha ningwa mexuliloshivike efimbo konguloshi komukunda Eexwa moshitukulwa shaHangwena. 

Nokuninga oshikanwa weedula 44 okwa tambulilwa koshipangelo shaShakati.

Omufekelwa ota holoka nena momhangu yaEenhana nomakonako opolifi otaa twikile.

-fhamalwa@nepc.com.na