Elelo laUkwanyama ola ulika   Ester Nakale opo a ninge elenga lakula loshikandjo shaKongo oshivike sha djako.

Nakale okwa nangekwa pambelewa komunashipundi welelo laUkwanyama Eliaser Waandja kOhangwena.

Mopaife ngaha moshitunda shaUkwanyama omu na omalenga ane ovakainhu.

Oikandjo ngaashi Omungwelume, Endola, Omhedi noshoyo Okongo otai wilikwa kovakainhu paife.

Nakale okwa ya ponhele yaStefanus Weyulu ou a xulifa omudo wa djako pefimbo kwa li ta wilike oshikandjo shaKongo.

Moshipopiwa shaye Nakale okwa ti ota kaleka po oulifilo woimuna mOkongo molwasi oimuna oya fimana.

“Oimuna oya pumbwa eenhele doulifilo da wana. Ohandi ka longela kumwe noovene vomikunda okuyandjaneka eenhele doulifilo,” ta ti.

Nakale okwa ti ota ka longela kumwe neeministeli da yooloka okutota po eepoloyeka dovanyasha nelalakano loku etela ovanyasha oyuuyemo. 

“Ohandi ka longela kumwe nopolifi okukandeka oumbudi woimuna unene tuu kombinga yokeengamba,” ta ti.

Okwa hokolola ta ti oshikandjohoololo shaKongo osho shimwe sha didilikwa ku na oumbudi woimuna wa londa pombada.

Nakale okwa kumaida oshiwana opo shi twikile okulongela kumwe momidingonoko davo okukelela oimbuluma ngaashi oumbudi woimuna nomahepeko omomaumbo.

“Kaleni nombili momimukunda deni. Oovene vomikunda longeni kumwe noshiwana sheni okukalekapo ombili noukumwe,” ta ti.

Okwa ti ombelewa yaye otai ka ninga omapekapeko kombinga yovanhu tava patulula eendingosho eevili dongula.

“Ovanhu nava longe momapya ndele ha ku pitila eengula keendingosho,” ta ti.

-fhamalwa@nepc.com.na