OTJIWARONGOS – Ministeris ǂUrusib tsî ǀHûhâsi !Oabadi dis ge mîmâisa ge dī, !nubusib ambulandi ǀorosib diba Otjozondjupa ǀkharib tsî nau ǀkharigu !hūb a ǂhabase ǁgoegu !nâs tsîna oresa hōbasa. 

Otjozondjupa ǀkharisi ǂurusib direkteri, Gebhardo Timotheusi ge ǂoa ge wekheb di Wunstaxtsēs ai ge mî, !nubusib ambulandi dib ǁîb ǀkharib !aroma noxopa kai ǂâiǂhansens ase īsa. 

Nē mâsib ge !Hoaǂkhaib 2024 dib !nâ kai !gomsiba ge !aroma. Otjozondjupa ǀkharib ge haka ambulandi ǀguide ūhâ hîa tsēkorobe Kaiǁkhaesa xu Tsumkwes ǁga garu daoba !ādi ī khami ra !naride.

 “Nē ǀkharib ge kaise a ǂhaba tsî da ge 14 ambulande hoa ǀkharib !aroma ǂhâba hâ.  !Hau!hausase da ge nēsi hakadi hîa sîsenūs mâsib !nâ hâdi ǀguide ūhâ, kaise sîsenūhes xa 600 000km hâga !khoehâse,” tib ge ge mî. 

ǁÎb di !gaesendi aib gere oe-am soab aib ge Dana ǀHûhâsi !gaeǁaredi mâisab, ǂurusib ministeris !nâb, Walters Kamayaba, Nampas ǀkhab ge ǂoa ge wekheb di Donertaxtsēs ai ūhâ i dî!nâǁgamǁares !nâ ge mî, ministeris ge 23 autona a ǁamaǂgansa hîa ambulandi !nâ nî dawa!khunihese. 

Nē auton !khōǂgā hân ge 11 !gupu auton tsî 6 Toyota Land Cruisergu tsîna. Haka auton ge Hoa !Hūbaisi ǂNûiǂgās (WHO) xa ǀkhaeb ase ministerisa ge māhe. “Sao ra !haros ge nē autode ambulandi ase dawa!khunisa, hoa ǂhâbasa ǂurusib xūna ǁkhāti nî !amǂgāhese tsî mâ ambulans hoas !nâ kharogu tsî sirenega nî kuruǂgāse. Ministeris ge nē ambulande ǀkharigu ǀgaisa ǂhâsiga ūhâgu, Otjozondjupab tsîna !khōǂgā hâse nî sîǂui,” tib ge Nampasa ge mîba. 

Nē ambulandi hîa ǀkharigu !nâ ǂurusib ǂnamipe ǀkharaǀkharasiba a hā-ū ǁkhāti, ǁaeb ai ǂhâbase !oabade mās !aromadi ge hoa ǂgaoǀkhādi ai diga nē ambulandi dawa!khunisa nî dīǀoaǀoatoas kara, o kaise !hae ǁaeb !nâ ǀkhariga nî ǁkhaeǁnâhe, tib ge Kamayaba ge mî. -Nampa