Uuministeli wuunamapya otau kumagidha oshigwana shi lopote mbala uuna oshipahu sha thiki miitopolwa yawo, opo shi vule okumonenwa ompito yokutsininwa omanga shi li pevi.
Oshipahu osha lopotwa sha uka kiitopolwa yaMusati oshowo Kunene.
Oshipahu osha monika natango koofaalama dhimwe miitoopolwa Otjozondjupa oshowo //Kharas. Omukuluntu nomukwateli komeho mendiki lyuuministeli wuunamapya Mildred Kambinda okwa ti, Oshipahu osha lopotwa kiishiindalongo ngaashi Angola, Zambia, Botswana oshowo South Africa.
“Otandi indile moshigwana uuna taya tidha oshipahu momapya gawo, opo yaa tidhe ngoka ge li koomwiidhi. Ngoka naga lopotwe opo ga tsininwe omanga ga gongala,” ta ti ngaaka. Ta ti, oshipahu kasha na oonkondo dhokutuka mombanda, ohashi kwathelwa okutuka kombepo onkene nasho ohashi tuka sha taalela ombepo hoka ya taalela.
Kambinda okwa kumagidha wo oshigwana kaashi lye oshipahu shoka shi li pevi, oshoka ope na ompito sha tsininwa nale, shoka sha nika oshiponga. Okwa kumagidha natango uuna aanambelewa taya tsinine oshipahu, aakwashigwana ya kale yi ipatela momagumbo oshoka omuti ngoka ogwa nika oshiponga.
Ferayi Zimudzi ngoka a li a kalele po ehangano lyiikulya nuunamapya lyIigwana ya hangana okwa ti, oomilliona 70 odha gandjwa okulwiitha uupyakadhi woshipahu moNamibia. “Okulamba oshipahu nokadhakadhaka oshidhigu oshoka oshipahu oshi li mokati kaantu niinamwenyo, omanga taku popiwa kutya omuti ngoka ogwa nika oshiponga,” ta popi ngaaka. Oshipahu shoka osha lopotwa sha zi koAngola, tashi yi moHangwena, Oshana, Oshikoto noMusati. Otaku hokololwa moshitopolwa shaShana pethimbo ndyoka, mwa lopotwa omapya gahamano ga halakanithwa po koombahu.
Uuministeli owa pandula oshigwana sho sha kambadhala okutidha oshipahu momikalo dha yooloka okugamena omapya gawo.