Lasarus Hakwaake
Omunyekadi mukulu woshilongo Penexupifo Pohamba okwa yandja omakumbafa kovakainhu va teelela oku mona ounona, ovo veli mewalanda mEenhana.
Eumbo lovakainhu ve li momateelelo olo ola tungwa payambidido laye manga a li omunyekadi woshilongo nohamu kala ovadjuunhu ve dule po50. Ovakainhu ovo va pewa oikumbafa ove fike po47, nokwa teelelwa keshe ou teke uya mo a kale a pewa oshikumbafa shimwe ile ivali ngeenge okwa mono ounona vavali. Moshipopiwa shaye Meekulu Pohamba okwa fatulula kutya konima eshi a dja mombelewa younyekadi woshilongo, okwa li a pewa oshinakuwanifwa shoku kala omukalelipo wounona ovo va dalwa naavo inava dalwa natango. Eshi oshe mupa opo a kale ta kongo omakwafo oku kwafa ounona ovo moshilongo ashishe. Okwa popya omakwafo aeshe aa okwa kongwa oku pitila moshikefa Penexupifo Pohamba. “Omakumbafa atya ngaha ohandi ke a yandja natango koshitukulwa Kavango” Pohamba ta ti. Oikumbafa ei oya yandja kehangano lovakainhu ovaChina.
Pohamba okwa dana onghandangala inene moku etapo omaumbo ile omawalanda ovadjuunhu moshitopolwa Ohangwena oo ta hangika mOkongo, mEenhana oshoyo mEngela ,notaa yakula unene omeme ava vehe na oyuuyemo yasha. Neenhele edi ode shi ninga shipu opo omeme ovo veli pokupuyuma va kale veli popepi noshipangelo.
Omukulunhu-wiliki woundjolowele moshitopolwa Ohangwena John Hango okwa pandula Pohamba omolwa olune laye noshiwana, eshi a lushe e li pyakidila noku nyanga noku yakula oshiwana nonande eli mepupi loukulupe. Okwa indila aveshe ovo va pewa oikumbafa opo ve i kwate nawa, nokwa ti ina hala nande oku uda kutya ope na umwe ehe wete ekumbafa laye. “Inamu ningilafana owii nande,” osho Hango a kunghilila onakupewa omakumbafa. Ngoloneya woshitukulwa Ohangwena Walde Ndevashiya okwa indila, opo omeme va twikile noku kaleka po omilandu dina sha noundjolowele odo tadi wilike oshilongo paife.