Omukulunhu wongudu yokulwifa oimbuluma moshitukulwa shaHangwena Nestor Moses okwa ti ongudu yavo oye shipondola okulwifa oimbuma neudo mOhangwena.
Moses okwa ti ova kala veli manga oukuni mokulongela kumwe nopolifi omo va kale tava kondjifa oimbuluma nomahepekafano oukashike kookanhu.
Pefimbo a ninga eenghundafana naKundana Etivali Moses okwa ti ongudu yavo oyo imwe ya didilikwa ya kala nokuyambidida ovanhu veli momhumbwe yoikulya, oidjalomwa nosho tuu.
Moses okwa popya ta ti mopaife oimbuluma oya shuna pedu moshitukulwa shaHangwena nonande muna ngaa oibofa yovalumenhu tava kwata ounona vashona onghonga.
“Oimbuluma ngaashi oumbudi owa shuna pedu paife mokufaafanifa nomudo wa djako. Otwa longo noudinini nelalakano lokukondjifa oumbudi ngaashi okuteya omaumbo nokuvaka oimuna yovanhu,” Moses ta ti.
Moses okwa ti ongudu yavo yoNetwork oya ninga oinyangadalwa ihapu ngaashi oshikunino shavo shili mOngha, omo mwakunwa omaludi oimeno.
“Otwe shipondola yoo vali okutunga ombelewa yetu yopashitukulwa ili pOngha ya tungwa ili pamufika woshinanena. Mombelewa yetu ohatu i longifa ngaashi okupungula oinima yoinyangadalwa yetu, okuninga oyongalela nokukala a tu yandjele oikulya koshiwana pombelewa,” Moses ta ti.
Okwa ti ova landa notuwa yavo ya kula yokukala tava longifa ngeenge tava i keenhele da yooloka ile ngeenge tava ka ninga oikonga momikunda.
“Ohatu ningi noikonga yokuwapeleka meedolopa detu domOhangwena omo hatu kala tweli u nganeka hatu wa paleka opo tu xwaxwameke oshiwana shi kale shina eudeko lefimano loukoshoki,” Moses ta ti.
Okwa hokolola ta ti ongudu yavo oye shipondola okuninga oikonga momikunda omo hava kala tava yandje ehongo kovalumenhu, nokounona voumati kombinga yomahepekafano oukashike kookanhu.
“Ovakulupe noilema, neefiye veli momhumbwe ohatu va pe omakwafo ngaashi oikulya, oikumbafa, noidjalomwa. Ohatu lalakanene okulwifa ondjala noluhepo moshitukulwa shaHangwena, naashi oshe tu pa opo tu kale a tu talele po ovanhu aveshe veli moluhepo fye tu kale twe vayambidida,” Moses ta ti.
Okwa yelifa ta ti oikulya ei hava longo moshikunino shavo ohai pewa ovanhu veli momhumbwe yoikulya omanga imwe ohava ve i landifa po opo va monemo oshimaliwa shomoshikefa shongudu yavo.
Okwa ti keshe omunhu okwa manguluka opo eva waimine okulwifa oimbuluma moshitukulwa shaHangwena.
Moses okwa weda po ta ti ovanhu na va kale tava kwatafana nombelewa yavo ngeenge veli moupyakadi opo va kale va ninga omalongekido nghee vena okuyambidindwa.
Okwa ti okwa pandula unene opolifi yomoHangwena eshi ya kala ina elongelo kumwe liwa nongudu yavo mokulwifa oimbuluma, okwa ti okwa pandula yoo vali aveshe va kala nokuyambidida ongudu yavo mokuninga oinyanyangadalwa.
“Ohandi indile oshiwana opo shi twikile nokukala tashi yambidida ombelewa yetu shaashi natango otwa pumbwa omakwafo ahapu,” Moses ta ti.