Opolisi miishitopolwa yokonooli oya londodha oshigwana opo shi ikaleke ko kule niimbuluma pethimbo lyomatango omanene, ndyoka twa taalela.
Opolisi miitopolwa Oshana nOmusati monkuundathana noshifonkundaneki shika oya ti, oya ilongekidha okulwitha iimbuluma oshowo oku taalela omaupyakadhi taga ka holoka pethimbo ndyoka.
Omukuluntu gwopolisi moshitopolwa shaShana Commissioner Rauha Amwele okwa ti, opolisi moshitopolwa she oya ilongekidha lela, yo itayi ka thiga nando emanya lya londa ke kwawo.
“Ndika olyo ethimbo aantu oyendji taye ya okutalela po aakwanezimo yawo, oshowo pashiyona komahala gaatelelipo. Iiponga yomoondjila oshowo iimbuluma oyindji ohayi holoka pethimbo lyomatango omanene,” Amwele ta ti ngaaka.
Ta ti, opolisi oya ilongekidha, okukaleka po omalandulathano agehe gomoondjila, okukeelela iiponga oshowo okugamena oshigwana okulongelwa omiyonena.
Tagwedha po ta ti, itaya ka pitika aahingi kaaye na omikanda dho kuhinga moshitopolwa shawo oshowo omuhingi e li kohi yiikolitha.
Amwele ta ti, opolisi otayi ka kala po kati koondjila ya ninga oomboloka, naakwashigwana otaya indilwa ya kale taya longele kumwe no polisi okulopota iiningwanima inayi uka momidhingoloko dhawo.
“Otatu ka kala natango tu na opolisi yi li miikonga tayi longitha omikalo dho kulwitha iimbuluma, onkene oshigwana otashi indilwa shi yambidhidhe opolisi opo ya adhe esindano mwaashoka, opo iimbuluma yi shonopale,” Amwelel ta kumagidha ngaaka
Okwa popi kutya aniwa omumvo gwa zi ko, aahingi yamwe oya li ya yi konima yekumba pethimbo lyomathimbo omanene sho ya hingi ye li kohi yiikolitha, ihe shoka ina hala shi iyendulule omvo nguka.
Okwa li woo alondodha aakwashigwana kutya inaya thiga omagumbo gawo kaage li metonatelo ngele otaya yi koondoolopa dhilwe oshoka ookalyamupombo otaya vulu okulongitha ompito ndjoka okuteya omagumbo gawo.
Omukuluntu gwopolisi moshitopolwa shaMusati Titus Shikongo okwati, oshitopolwa shaMusati nuumvo otashi kalonga sha thikama onkene ka pena ompito yiimbuluma nenge yo miyonenwa tayi ka pitikwa.
“Opolisi otayi ka kala ya homata ethimbo alihe no taya ka kala ya ilongekidha okukutha onkatu uuna pwa holoka sha,” ta ti ngaanga.
Shikongo okwa gwedhapo ta ti, aayendinandjila oshowo ooyene yiihauto inaya thiga iinima yongushu moohauto oshoka otashi ka nana oombudhi dhi teye oohauto e taya yugu mo shoka shi li mo.
”Kehe omukwashigwana na kale ena oonomola dho polisi yi li po pepi naye, opo a vulu okulopota iimbuluma tayi holoka nenge a vule okulopota omayinyengo ga puka,” Shikongo a kumagidha.
Ta ti, nuumvo inaya hala okulopotelwa iiningwanima iiwinayi, ihe oya hala kehe gumwe atyapule ethimbo ndyoka nombili, onkene oshigwana nashi iyuthe koompango adhihe dha tulwa po.
– vkaapanda@nepc.com.na