Auleria Wakudumo
Omupopiliko mombelewa yOmuprima Maxmus Halwoodi okwa holola ta ti omaumbo aeshe e li 27 000 oo a shangifwa oshikukuta moshitukulwa shaShikoto otaa ka pewa oikulya.
Eshi osha landula eyambidido loikulya oyo ya dja kepangelo laChina noya fika moNamibia oshivike eshi.
Halwoodi okwa ti omaumbo 28 485 mOshikoto okwe lishangifa notaa ka pewa oshako imwe yolwishi keshe eumbo.
“Sha hala kutya omaumbo 1 485 itaa mono oshikukuta sholwishi ashike otava pewa eshi hashi yandjwa shito, okakutu koufila (20 kg), ekende lomaadi, eendoxa nhee deeshi ile osopa yoSoya,” Halwoodi ta ti.
Halwoodi okwa ti shaashi oshako oya kula, oya teelelwa i kwate eemwedi mbali, Marsa naApilili naava tava ka pewa olwishi otava ka pewa ashike vali konima yeemwedi mbali.
Oshikukuta sholwishi osha teelelwa shi kale sha fika moshitukulwa shaShikoto moule wefimbo lixupi.
Halwoodi okwa weda po ta ti ombelewa yavo oya hovela nale okututa oushako volwishi opo va kale va fika koshitukulwa shaShikoto.
“Ngaashi shi li omukalondjiikilile, ohatu kwafelwa kovanambelewa vetanga leameno okututila oushako ava momaloli. Ohatu shi ningi neendelelo opo tu kale twa kwashilipaleka kutya oshikukuta eshi osha fika koovene pefimbo,” Halwoodi ta ti.
Halwoodi okwa holola ta ti ova katuka onghatu meendelelo opo oikulya i fike koshiwana pefimbo.
Oikulya yoshikukuta kai shi yokupungulwa ndele oya pumbwa okuyandjwa keshe omwedi opo tu kwafe oshiwana omwedi keshe.