Hamushanga wevava lovanyasha loSwapo Efraim Nekongo okwa pula opo efiku 12 Mai omo mwa dalwa nakufya Omukokolipresidente Sam Nujoma opo li ningwe efudo laaveshe.
Nekongo okwa li ta popi koshivilodimbuluko osho sha ningwa Omaandaxa keumbo laNujoma koWindhoek.
Efiku olo, ovanyasha okwa li va holoka momwaalu muhapu okuyandja efimaneko lavo koshivilodimbuluko shaNujoma.
Oshivilodimbuluko eshi okwa li ashike sha nuninwa ovanyasha nounona.
Okwa ti elalakano opo Ovanamibia va kale tava dimbuluka efiku ledalo laNujoma molwaashi okwa longa oshilonga sha fimana okukala a tumbalekwa mefiku ledalo laye.
“Otwa pandula oilonga iwa ya longwa kuNujoma. Omulumenhu ou okwa li e hole oshiwana shaye pehe na omunhu ta ningwa okatongo,” ta ti.
Okwa ti pefimbo Nujoma kwa li omupresidente okwa yandja omhito kovanyasha moshilongo va tote po evava lovanyasha loSwapo.
“Okwa kala alushe ta lombwele evava lovanyasha opo tu longe noudinini okuyambula po ongudu yoSwapo shaashi ovanyasha ovo ovaleli vokomongula,” ta ti.
Nekongo okwa lombwela ovanyasha opo va twikile okukala noukumwe mongudu yoSwapo ngaashi naana Omukokolipresidente kwa li e hole oukumwe.
Iyaloo Shiimi a dja koshikondo shounona vomoSwapo okwa tanga Nujoma ta ti ngeno ka li po ngeno Namibia ina manguluka.
“Otwa pandula tatekulu Nujoma shaashi okwe tu etela emanguluko.
Paife otwa mona eemhito dokuya kofikola,” ta ti.
Shiimi okwa pula ovaleli opo va kufe ko oshihopaenenwa shiwa moilonga tai hokifa ya longwa kOmukokolipresident,” ta ti.