Ngoloneya woshitukulwa shaMusati Erginus Endjala okwa ti oshitukulwa shaye oshe lilongekida okuninga oshivilodimbuluko shOmukokolipresidente Sam Nujoma osho tashi ningwa mongula kEtunda.
Epangelo otali ka yandja oshimaliwa sheemiliona N$7 koitukulwa iheyali oyo ya tofwa mo okuninga oshivilodimbuluko shaNujoma.
Nujoma okwa xulifa mepupi lomido 95, momafiku 8 Febuluali koshipangelo shopaumwene koWindhoek.
Ota fudikwa mefiku 1 Marsa komaendo omapendafule oHeroes Acre koWindhoek.
Efiku omo ta ka fudikwa otali ka kala nokudimbulukiwa ongefiku lefudo moshilongo.
Endjala okwa ti oshivilodimbuluko otashi tameke potundi 14h00 keumbo looNujoma.
Okwa ti ombelewa yaye oye liungeneka okukala ya tula oinima aishe peenhele.
“Otwa dika eetenda da wana, oipundi nayo oya wana okulongifwa kovanhu ve li momwaalu muhapu,” ta ti.
Ngoloneya okwa ti okwa teelelwa ovanhu tava di koshitukulwa shaKunene okuwaimina ovalilifya keumbo kEtunda.
Endjala okwa lombwela oshiwana okudja kounona mwa kwatelwa ovanyasha opo va holoke momwaalu muhapu okuyandja efimaneko kOmukokolipresidente.
Okwa yelifa ta ti efiku loshivilodimbuluko kEtunda otaku twalwa olutu laNujoma omo tali ka mona omhito yokuya meumbo lavo.
Ngoloneya woshitukulwa shaHangwena Sebastian Ndeitunga naye okwa popya ta ti ombelewa yaye oya tameka nale nomalongekido okuninga oshivilodimbuluko Etitano kEenhana.
Ngoloneya woshitukulwa shaShikoto Penda ya Ndakolo okwa ti ombelewa yaye otai ka ninga omalongekido oyeendifo okutwala oshiwana kodoolopa yEenhana noGrootfontein oku taku ningilwa oshivilodimbuluko.
Okwa ti osha fimana opo ovanhu va ka yandje efimano lavo laxuuninwa kOmukokolipresidente unene tuu oonakulwa vakulu.
Omafiku 22 Nujoma ota ka ningilwa oshivilodimbuluko koshitukulwa shaKavango East, kodoolopa yaRundu.
Omafiku 23 otaku ka ningwa oshivilodimbuluko koshitukulwa shaZambezi kodoolopa yaKatima Mulilo, nokudja opo omafiku 24 olutu laye otali twalwa koshitukulwa shaOtjozondjupa.
Omafiku 25 natango otaku ka ningwa oshivilodimbuluko koshitukulwa Erongo, modoolopa yaWalvis Bay.
Oshovilodimbuluko shopashitukulwa shaxuuninwa shaNujoma otashi ka ningwa kodoolopa yaKeetmanshoop koshitukulwa shaKaras.