ONGWEDIVA – Oshiwana koitukulwa ya yooloka osha pandula epangelo molwaashi la longekida nawa oivilodimbuluko yOmukokolipresidente Sam Nujoma, ya ningilwa koitukulwa ihetatu.
Nujoma okwa xulifa momafiku 8 Febuluali neudo, nota pakwa mOlomakaya olo twa uka.
Okudja Etine loshivike sha dja ko olutu laNujoma okwa li la shingwa okudja kokapale keedila kaAndimba Toivo ya Toivo kOndangwa fiyo okomukunda wavo kEtunda koshitukulwa shaMusati.
Olutu lOmukokopresidente okwa li la twalwa natango koshitukulwa shaShana , Ohangwena, Kavango East, Zambezi, Otjozondjupa, Erongo nosho yo koshitukulwa shaKharas.
Ovanhu mwa telwa ovanafikola okwa li va holoka momwaalu muhapu ve li ofika pomukunghulo wopate pefimbo ta pa ende oshikefa.
Ovanafikola, oonakulwa vakulu novakulupe okwa li tava kwena okumona oshikefa sha humbatwa motuwa. Oshiwana okwa li tashi imbi moshili okuyandja efimaneko lavo kuNujoma. Ovapopi va yooloka ova tanga Nujoma ongomuleli muwa, omulumenhu a longa nelitulemo okuetela Namibia emanguluko. Efiku lotete oshikefa sha shingwa okudja kokapale keedila kOndangwa, otuwa oyo kwa li ya humbata oshikefa okwa li tai shingwa osheendelela.
Ovanhu ohava mono ashike eshi otuwa ya pita po nale shokadila taka tuka. Efiku la landulako olutu olwa li la twalwa kOhangwena, pa li pe na elunduluko molwaashi otuwa ya humbata oshikefa kakwa li tai shingwa vali oshendelela.
Otuwa okwa li tai ende kashona okudja kOutapi, Oshikuku, Omungwelume, Onhuno fiyo tai fiki kEenhana.
Naashi osha yandja omhito koshiwana osho kwa li shi li pomukunghulo wopate shi kale sha mona nawa otuwa ya humbata oshikefa. Ovanhu okwa li ve kwete oupandela vaNamibia tava molola kotuwa ya humbata oshikefa tava ti: enda po nawa tatekulu wetu.
Olutu lOmukokolipresidente ola nangala fiyo ongula peenhele opo pa ningilwa oivilodimbuluko opo oshiwana shi mone omhito yoku mu tala koshipala.
Oshiwana osha enda eendjila diledile okufika peenhele opo pa ningilwa oivilodimbuluko.
Ovakulupe vamwe ova longifa oshimaliwa shavo shopendjela okufuta olefa opo va dule okufika koshivilodimbuluko shaNujoma.
Okaana kokamati keedula 13 John Kakuwa oka enda oshinano 200km okudja komukunda wavo fiyo okodoolopa yaRundu nelalakano lokukayandja efimaneko laye.-fhamalwa@nepc.com.na