Uuministeli wiikwamina noonkondo owa pititha omushangwa kutya omwedhi nguka gwaMaalitsa oondando dhomahooli gopetolola nodisela otadhi londo noothilinga ntano.
Ngaashi sha kala onkalondjigilile okuza omimvo dha piti, omahooli oga kala taga lunduluka unene gu uka pombanda kehe omwedhi, nonando lumwe haga shuna ngaa pevi sha ikolela komayalulo.
Iikando oyindji oondando odha kala tadhi londo.
Omwedhi gwa zi ko omahooli okwa li ga londo noothilinga ne. Omahooli gopetolola okwa li taga kotha N$20.67, omanga godisela kwali taga kotha N$20.02 molita.
Omwedhi nguka odisela oya londo notayi kala tayi kotha N$21.52 molitela omanga opetolola tayi kotha N$21.42 molitela.
Uuministeli owa gandja etompelo kutya omahooli otaga gwendhelwa omolwoshimaliwa shefendelo lyoondjila sha gwedhelwa noothilinga mbali, shoka sha thiminike iihohela yi ye pombanda.
Shika osha li sha uvitha nayi aahingi yoohauto, sho ya kala taya nyenyeta okupitila komalungula osho wo miikundaneki ya yooloka kutya oshike epangelo itaali gwanitha po ashike shoka lyi na okufuta itaali kutha oshimaliwa moshigwana.
“Oshike tu na okumona iihuna komahooli. Oshike epangelo lya nyengwa okukandula po uupyakadhi mboka tau thimininike oshigwana,” taya pula ngaaka.
Taya ti komasiku gokomeho itaya ka hinga we oohauto oshoka kaye wete uupyakadhi mbuka tau ka hula.
Omupopiliko nomugandji gomauyelele muuministeli wiikwamina noonkondo Andreas Simon okwa ti omahooli ohaga lundululuka omwedhi kehe, shoka sha kala tashi ningwa okuza omimvo dha pita.
‘’Iiyeti mbyoka hayi thiminike opo omahooli ga shune pevi oyo etompelo omahooli moNamibia ge na okushunithwa pevi, sha ikolelela komayalulo,” ta fatulula ngaaka.
Ta ti, kutya oondando dhomahooli odha kala tadhi londo omolwa omatompelo ga yooloka.
Sha ikolela kuuyelele wa li wa pitithwa kuuministeli wiikwamina omahooli oga kala nokulonda molwaashoka oondando dhomahooli inaaga dhindwa nadho odha kala nokulonda koEurope, hoka kwa ikwatelela omatokolo gelundululuko lyomahooli.
“Opo uupyakadhi mbuka wu kandulwe po, otashi ka pula iilongo yaAfrica okumanga uukumwe kumwe okudhinda nokukondolola eyetepo lyomahooli shoka tashi ka pula oobiliona ondhindji,’’ ya fatulula ngaaka.
Ya gwedha po kutya etokolo ndyoka kali shi epu no ita li ningwa pethimbo limwe, ihe ota li ka kwathela egwo pevi lyongushu yondando yomahooli.
Omumvo gwayi omuprima Minista Saara Kuugongelwa Amadhila okwa po pi kutya Namibia okwatula miilonga ekandulepo lyuupyakandhi womahooli wa taalela oshilongo.
-vkaapanda@nepc.com.na