Omukulupe weedula 64 okwa xulifa eshi a dengwa nomipini koshitenya shaye sheedula 44 mexuliloshivike meumbo lavo, koshitukulwa shaKavango West.

Nakufya okwa tongolwa oye Ndahepa Ihemba omukalimo womomukunda Mpuma. Omulumenhu ta fekelwa medipao omo okwa kwatwa po. 

Oshivike sha dja ko natango, koshitukulwa shaKavango West okwa dipawa omukulupe weedula 74, Kuip Daniel a tuwa neonga koshitenya shavo pefimbo kwa li tava nu omalodu.

Omulumenhu weedula 38 ou e li oshitenya okwa tambulilwa moshipangelo shaTsumeb molwaashi okwa tuwa neonga kovakwashiwana konima eshi a twa xemweno.

Omupopiliko wopolifi koshitukulwa shaKavango West Chief Inspector Raimbert Muronga okwa hokolola ta ti omufekelwa okwa ya keumbo oku haku di omukainhu waye opo e ke mu pule kutya omolwashike a hala okuxulifa po ekwatafano lavo lopaihole.

Okufika meumbo, omufekelwa okwa nukila omukainhu waye nekatana ndele te mu tete moshipala.

Inamweno okwa endelela ndele ta i pokati koshitenya nomonakadona ta kendabala oku va kufa kumwe.

Omukainhu ou okwa faduka po a uka moixwa nokufiya ina noshitenya meumbo.

Opolifi oya hokolola tai ti oshitenya osha kufa omupini ndele tashi denge inamweno komutwe.

Omukulupe okwa xulifila meumbo laye.

Otaku hokololwa kutya omufekelwa ove na ounona vatano nomukainhun waye. Nakutetwa nekatana okwa li a tambulilwa moshipangelo ashike paife okwa shuna keumbo. Omufekelwa okwa kwatwa po nota pangulilwa oshibofa shedipao mwa kwatelwa shonghendabala yedipao lomukainhu waye weedula 35.

-fhamalwa@nepc.com.na