Omulumentu gumwe anuwa okwa yugwa iinima ye ayihe mwa kwatelwa iimaliwa, ohauto ye oya tsuwa omataiyela nokudhengwa omakende agehe sho kwa li ta nwetha omahooli gangungula koongamba dhaNamibia nAngola Omaandaha.
Omupopiliko gwopolisi moshitopolwa shaHangwena Warrant Officer Andreas Nghiyolwa okwa koleke oshiningwanima shoka, ihe pethimbo ndyoka uuyelele awuhe kawa li wa thika puye.
“Otwa kala nokukumagidha oshigwana kutya koongamba ihaku endwa kaakwashigwana, ihe ohaku kala ashike aanambelewa yopolisi mboka taya patolola,” ta nyenyeta ngaaka.
Ta ti, oya kala nokulopotelwa iiningwanima tayi ningwa koongamba hoka, sho oshigwana tashi ka nwetha omahooli gangungula.
Ta popi kutya koongamba okwa nika oshiponga, ha kehe gumwe e li hoka ta landitha omahooli moshili, yamwe oya endela okuyuga aantu iinima yawo.
“Opolisi yaNamibia oya kumagidha oshigwana shi hulithe po oku ka nwetha omahooli taga zi koAngola haga landithwa shaa li paveta koongamba dhaNambia nAngola,” ta kumagidha ngaaka.
Ta gwedha po kutya, osha nika oshiponga oshoka ohaya yugwa iinima yawo nokumonithilwa ko iiponga pethimbo taya kambadhala okulanda omahooli. Ta ti otaya vulu okukanithila ko oomwenyo dhawo.
Omukuluntu gwopolisi moshitopolwa shaHangwena Ottilie Kashuupulwa okwa koleke kutya opolisi oyi shi shi kutya Aanamibia ohaya yugwa iinima yawo nokumonithwa iiponga uuna taya landa omahooli ngoka taga ithanwa Ngungula.
“Aantu mboka haya ponokelwa kAaangola taya landitha omahooli, ihe ihaya lopota iiningwanima mbyoka kopolisi oshoka oye shi shi kutya shoka taya ningi kashi li mondjila,” ta popi ngaaka.
Kashuupulwa okwa ti, omapopyo ngoka kutya opolisi ohayi kala ya tala ashike aantu mboka taya landitha ya manguluka kadhi shi dhoshili, opolisi kehe esiku otayi kwata ko omandini uuna ya adha taga landithwa moNamibia.
Ta ti, opolisi ihayi vulu ashike oku ya ninga sha uuna taya landithile moshilongo shawo.
“Onda hala okuyelitha kutya Aaangola mboka ihaya kala mOshikango ihe oye li kooha dhondhalate ndjoka ya teta po, pokati kaNamibia naAngola – ya gama kombinga yaAngola,” ta popi ngaaka.
Kashuupulwa okwa kumagidha Aanamibia ya hulithe po okulanda omahooli miihwa, ngoka a hala omahooli na ka lande meni moAngola, pootenga. –vkaapanda@nepc.com.na