ONGWEDIVA – Omunashipundi welelo laUkwanyama Elias Waandja okwa pula oshiwana opo shi tameke okutwala omaongo kOuhamba kOmhedi nelalakano lokulilongekidila oshivilo shomaongo osho tashi ka kala ko momafiku 10 Mai 2025.
Okwa yelifa ta ti onduda yokutuvikila omaongo oya longekidwa nale okukala ya tulwa omaongo mahapu oo taa ka nuwa koshivilo.
Omudo keshe omalelo opamifyuululwakalo monooli ohaa dimbuluka efiku lomaongo omo haku hoololwa kutya oshivilo otashi ka ningilwa peni.
Omaongo okwa fimana pamufyuululwakalo wOshiwambo naashi osha eta opo ku kale ku na efiku lowina olo hali eta omalelo opamifyuululwakalo pamwe.
Omudo wa dja ko oshivilo shomaongo okwa li sha tyapulilwa kelelo laNdonga.
Okwa didilikwa efimbo ovanhu hava kala va hangana pamwe novashiinda shavo tava nu ongongola vo tava imbi tava ti: “ongongola naikuke tu nwe oikundu.”
Omaongo okwa fimana natango molwaashi ohaa etele ovanhu oyuuyemo eshi hava landifa omaongo.
Waandja okwa ti koshivilo shomaongo otaku ka kala omalelo opamifyuululwakalo a yooloka, Omupresidente woshilongo nosho tuu ovaleli veendodo da yooloka.
“Otwa tameka nale okuninga omalongekido oshivilo eshi. Otwa teelela omwaalu wovanhu tava ka holoka kOuhamba,” ta ti.
Okwa ti ovanhu nava ye va ka nwe omaongo oshali molwaashi omunhu keshe ota ka dja ko a makela ongongola.
“Oshivilo shomaongo osha fimana natango kovanafikola opo ve lihonge omifyuululwakalo da yooloka nosho yo okushiva eehamba domalelo a yooloka,” ta ti.
Waandja okwa kumaida ovanhu opo va nwe omaongo nombili pehe na omalwoodi unene tuu kendingosho.
“Omunhu ina pumbwa okuhumbata ombele ile ekatana ngeenge ta ka nwa omaongo poushiinda nokeendingosho,” ta ti.
Okwa ti paife ngaha omalenga kelelo laUkwanyama okwa ya manga mokafudo omwedi ou opo a ka nwe omaongo.
Waandja okwa ti ovanhu nava twikile okulonga momapya ndele hakupitila eengula keendingosho ile omunhu ta i keumbo lamukwao ta ka konga omaongo pefimbo ovanhu ve li momapya.