Auleria Wakudumo 

Ovanhu vatatu, mwa kwatelwa ounona vavali veedula hamano, kamwe komido 11 nomulumenhu weedula 44 ova xulifa eshi va fya momeva moiningwanima itatu ya yooloka, ya ningwa mexuliloshivike. 

Otaku hokololwa ounona va li tava yoo pamwe navakwao vatano pefimbo loshiningwanima. 

Eshi osha ningilwa momukunda hau ifanwa Pohamba mOshakati, omutenya wOlomakaya. 

Omupopiliko wopolifi Deputy Commissioner Kauna Shikwambi okwa holola ta ti manga tava yoo, umwe okwa dja mo muvakwao ndele ta ka yowa mondobe i lili oyo vati ile i dule omo kwa li tava yoo navakwao. 

Okwa hovela ta ningine koshi yomeva. Umwe womuvo okwe ya ngeno okuyowa mo mukwao ashike aveshe ova xulifa. 

Oshiningwanima shikwao, omulumenhu weedula 44 okwa xulifa eshi a wila momeva momukunda Omaalala moshitukulwa shaShana. Otaku hokololwa olutu laye le lituwa ashike la kaama kombada yomeva.

Nakufya okwa tongololwa oye Alweendo Johannes. 

Oshiningwanima sha yooloka, omulumenhu weedula 42 okwa xulifa sha dja eshi a wilwa kekuma. 

Oshiningwanima eshi osha ningilwa molukanda lEenhokele kOshakati West, sha ningwa lwopo 17h30 Olomakaya. 

Nakufya okwa tongololwa oye Martin Kakololo. Otaku hokuhokololwa Kakololo a li ta ngumuna po eumbo pamwe navakwao vane. She likolelela kuvakwao, vati Kakololo okwa kufa ohamala kuvakwao ndele ta denge ekuma luvali manga inali wila komutwe waye nokuxulifa poshiningwanima. Oshiningwanima shikwao, omunadolongo weedula 36 okwa xulifa sha dja eshi e lidenga po modolongo yaLuderitz. Osho osha ningilwa modolongo yaLuderitz, sha ningwa lwopo 13h00 Etitano. 

Nakufya okwa tongololwa oye Jacobus Hendricks. 

Otaku hokololwa Hendricks a li a twalwa koshipangelo ashike okwa fikila a xulifa nale. 

-wakudumoauleria@gmail.com