Omukiintu gwomimvo 30, okwa hupu meso sho anuwa a li u umbilwa metale komulumentu OmuAngola ngoka anuwa e mu kwata koonkondo. 

Olopota yiimbuluma yehuliloshiwike oya holola kutya oshiningwanima shoka osha holoka momukunda Olumbongo kOnethindi moshitopolwa shaShana. Otaku hokololwa kutya omukiintu nomulumentu gwomimvo 21 ngoka okwa li taya nu pamwe pehala lyomanwino. 

Sho anuwa ya mana okunwa okwa li ya endele pamwe okuya kegumbo. Omulumentu ngoka anuwa okwa li a pilukile po omukiintu ngoka e te mu kwata koonkondo. 

Opolisi oya ti, sho anuwa a mana oku mu longela omuyonena ngoka, okwe mu umbile metale lyomeya e ta matuka po. 

Omukiintu ngoka anuwa okwa li a kugu ta pula ekwatho, noshigwana osha li sha yi meendelelo oku mu hupitha. 

Omulumentu ngoka okwa mangwa po kopolisi. 

Moshinigwanima oshikwao sha faathana omulumentu gwomimvo 52 okwa mangwa po sho anuwa a kwata koonkondo okakadhona ke na uulema wopamadhiladhilo omanga ka kotha. 

Oshiningwanima shoka osha holoka momukunda Okadhiya moshitopolwa shaShikoto. 

Otaku hokololwa kutya omulumentu ngoka okwa li i iyakele mondunda moka omanga aanona ya kotha, e ta kwata okakadhona hoka koonkondo. 

Okamati komimvo omugoyi hoka anuwa ka li mondunda moka oka li ka zi mo taka matuka ka ka lopotela he yokakadhona hoka ka kwatwa koonkondo. 

Shoanuwaakathikamondunda, omulumentu ngoka okwa adhika a ya nale ontuku. 

Omusamane ngoka okwa mangwa po. Okakadhona komimvo 14 anuwa oka kwata koonkondo kuwalye ethimbo kwa li taka zi kookamba. 

Opolisi oya ti oshiningwanima shoka osha holoka lwopotundi 03h00 Olyomakaya, kOkahandja kolukanda Nau-aib. 

Otaku hokololwa kutya okakadhona hoka okwa li taka e ende ku uka kegumbo sho ka tsakanekwa komulumentu ngoka e ka humbula sigo oketoto lyiiyagaya hoka e ka kwatela koonkondo. Omakwatokoonkondo oga pimbila oshilongo ashihe, opolisi otayi lopota aantu taya kwatwa koonkondo esiku kehe. 

-vkaapanda@nepc.com.na