Omugandji gwomauyelele mehangano lyoNamWater Lot Ndamanomhata okwa ti ota kwashilipaleke kutya omeya ngoka ga ningi esiku ga pata miitopolwa yimwe monooli otaga tameke okweenda nawa nena.

Ndamanomhata okwa popi ngaaka omolwomunino ngoka gwa ningi esiku gwa topa pokati kOshakati nOmakango nogwa thigi aakalimo oyendji yaa na omeya oshiwike shika.

Ta ti omeya oga pata ngaashi koHelao Nafidi, Ondobe, Endola, Engela, Omulonga, Ongenga, Oshikango osho wo Ombinga yimwe yOshakati.

“Omunino ogwa topa okuza Etiyali lyoshiwike shika. Aaniilonga yetu oya kala nokulonga omunino ngoka okuza esiku gwa topa,” ta popi ngaaka.

Ndamanomhata okwa ti NamWater ota tsikile okulonga nuudhiginini okugandja omayakulo ge li nawa koshigwana. 

“Otatu indile wo oshigwana shi kale tashi lopotele ehangano lyoNamWater uuna pwa holoka sha,” ta indile ngaaka.

‘’Omahala ngaashi iipangelo, oosikola osho wo omahala ngoka itaga vulu okukala gaa na omeya omolwiinakugwanithwa yi na ongushu naya dhenge koonomola ndhika, 081 129 9483, Oshana 081 124 5567 omanga kOshikoto ya dhenge konomola 081 145 527,” ta ti ngaaka.

Oshigwana osha ningi esiku tashi nyenyeta kashi na omeya sho ga ningi omasiku ga pata koombinga dhimwe miitopolwa Oshana osho wo Ohangwena.

Martha Shivute omukalimo gokEkuku mOshakati okwa ti okwa ningi esiku ta teke omeya koondoolopa dhopopepi hoka ku na omeya.

“Otwa ningi esiku twaa na omeya, ihe inatu tseyithilwa kutya omeya otaga pata oshiwike shika. Ngele ope na uupyakadhi mboka tau patitha omeya nau kandulwe po mbala,” ta nyenyeta ngaaka.

Ta ti, itaya vulu we okulongitha uundjugo ngele uushitwe tau ithana oshoka kape na omeya.

Ta gwedha ko ta ti omeya ogo omwenyo.

-vkaapanda@nepc.com.na