OSHAKATI – Elelo lyondoolopa yaShakati olya kumagidha oshigwana opo shi kale nomandoloma giiyagaya pomagumbo nelalakano okukaleka ondoolopa ya yela.

Omugandji gomauyelele melelo lyondoolopa Katarina Kamari okwa ti okweekelahi iiyagaya kehe mpoka ohashi kakeke ondoolopa.

“Oshiwanawa ngele kehe egumbo lya kala lyi na endoloma lyiiyagaya. Elelo lyondoolopa ohali landitha omandoloma ge na ashike oN$950 mbyoka hayi vulu okufutwa komwedhi sigo we yi gwanitha,’’ ta popi ngaaka.

Ta ti, ngoka itaa vulu okulanda endoloma na kale e na omanayilona moka ha gongele iiyagaya opo kayi halakane.

Ta gwedha po ta ti, shoka otashi ka ningila wo aawopaleki yondoolopa ya opaleke nuupu.

“Ohashi kala oshidhigu okutoola iiyagaya ayihe ngele oya halakana, ihe ngele oya gongelwa pehala limwe, aawopaleki otaya longo nawa osho wo nuupu. 

Ta ti, nonando ondoolopa yOshakati ohayi kutha esiku lyokwokpaleka omumvo kehe, esiku ndyoka nali kale oshiholelwa shakehe esiku.

Ngoloneya gwoshitopolwa shaShana Elia Irimari okwa li a holola euvonayi omolwaakalimo yondoolopa yaShakati yaa na ko nasha nuuyogoki.

Ta popi nokukumagidha oshigwana kombinga yokoopaleka ta ti, ekako ohali etele aantu olungwenye.

“Uuyogoki owa simana onkene oshigwana oshi na okukala tashi opaleke omalukalwa gasho osho wo omidhingoloko dhasho opo ku yandwe omikithi tadhi vulu okupitila moongaga,” ta popi ngaaka. 

Ta kumagidha oshigwana shaShakati kutya, nashi kale sha tula uuyogoki komeho.

Ta gwedha po ta ti, otashi kala onkalo ombwaanawa ngele oshigwana tashi tula uuyogoki komeho.

“Ngaashi naana sha li moshipalanyolo shomumvo gwa yi, ondoolopa yaShakati nayi zize, otandi kumagidha aakwashigwana ya itule mo mokukuna omiti,” ta kumagidha ngaaka.

Ta ti omiti ohadhi dhana onkandangala momikalo dha yooloka, nodha simana wo monkalamwenyo yomuntu kehe.

“Omiti ohadhi opaleke oondoolopa, ohadhi gandja ombepo nohadhi koleke uundjolowele womuntu,” ta ti ngaaka.

-vkaapanda@nepc.com.na