ONDANGWA – ǀAsa ǂHanumās ǁGam-i dis ge ǀhûhâsigu hîa hâ a tsaugu, xoradi tsî ǁkhaega xu ǁgam-e ra ǂgaena ǁguisa ǁgaragu !nakan nēsa nî dīsa nî ǂgaoǀkhā, aiǁgausen ge nē ǀasa ǂhunumās !oagu ǂharugun ân !aroma lesensisa nî ǂganamsenba, Ministeris !Hū-omkhâis, ǁGam-i tsî !Hūde ǁKhawa Kō!gâs disa xu. Nē ǂhanumās ǂgaoǀkhās ge ǁkhāti ǀguiǀguibe khoen !aromas tsîna a sîsenxa, ǁîn ga ǀasa tsaugu tsî ǁkhaega a kuru ǂgao soagu !nâ. 

Nē ǂhanumās ǁîna !khōǂgā taman ge aiǁgause, ǁgam-e omaris tawa sîsenūs, ǁgâu-ais ai ǂgāsa ǂkhari hairon tsî !hanade ǁgammās tamas ka i o ǁgâus tawa xū-e ǂnuwis !aroma tsauga xu ǂgaesa. “Hanats ǁgam-e omaib ai sîsenūs !aroma tsaugu tsî ǁkhaega xu nî ǂgaes kara, ots ge lesensi-ets nî ūhâsa ǂhâbasa tama hâ. Tsîts nî hâna !ā!khōmai-i ǀhonkhoe-ai !âb !auga nî tsauba khao tsî ǁgam-i a ǁkhaubasa !âb !nâ ī tamas kara, ots tsînats ge lesensisa ǂhâba tama hâ. Xawets nî tsaub tamas ka i o ǁkhaeba sa ǀgurihâ ǂharugub !aromas kara, ots ge ra ǂgaoǀkhāhe lesensisats nî ūhâ !khaisa,” tib ge Sakeus Ihembab, ǂnûǁkhaeba ra !nakaǂnôa direkteri ǁgam-i !âb diba ge mî. Ihembab ge ǁGam-i ǁUib ǂGaeǂguis ǂHanumās hōhō!nâs ǂnûs tawa Ondangwas !nâ nēsa ǂoa ge wekheb Denstaxtsēs aib gere !hoa soab  ai ge mî. ǁGam-i ǁUib ǂGaeǂguis ǂHanumās 2013ǁkurib dis (11ǁî ǂHanumā 2013) hîa 2023ǁî kurib ai ge sîsenxa kaihes di ǁgūbas ge, ǁgam-e da ra hōxū !khaiga mûǂam, omkhâi, sîsenū, !ûi!gâ tsî ǁkhaubas !goaxa ǁaeb !aromasa ǁawoǁawosa. ǀHûhâsigu ge ra ǂganhe nē ǀasa ǂHanumās di ǂgaoǀkhāde ǂan tsî ǂhanuse ǁnâu!āsa, in tā ǂhanuga ra !ûǂamse hōmâsen. 

Nēsats nî ǁnâuǀnam tama īs kara ots ge N$50 000 tamas ka i o koro kurigu di !khō-oms ǁkharaba nî ǁgui-aihe, ǁnān hîa nē !ûǂams nâ !nāsa !nāde ǀhapixase ra hōhen nî N$500 000 tamas ka i o 10 kurigu !khō-oms ǁkharaba nî māhese ī hîa tamas ka i o hoa ǀgamna a ǁgui-aihe ǁkhā hîa.