ONAMUTAI- Omukulu waNetumbo Nandi-Ndaitwah okwa ti ove udite etumba eshi meumbo lavo mwa dja omuulikwapresidente ta ningi  omukainhu wotete ta lele Namibia.

Mekulu Canner Ndakondjelapo Kalimba womido 81 okwa popya edi mOsoondaxa kongeleka yaNamutai Anglican pefimbo ondenge yaye Nandi-Ndaitwah tai lekelwa keongalo.

Nandi-Ndaitwah okwa putukila pongeleka yaNamutai oyo yakokolwa po kuxe oo a li omufitaongalo wotete wongeleka oyo.

Etitano lomafiku 21 Marisa ota li kala efiku londjokonona ya kula moNamibia eshi Nandi-Ndaitwah ta ka ninga omukainhu wotete wOmupresidente woshilongo.

Oshiwana, ovaleli vopamifyuululwakalo, ovaleli vopapolitika, ovabisofi vengeleka da yooloka okwa li va holoka momwaalu muhapu okuuda omambo pamwe nomuhoololwapresidente wavo.

Kalimba okwa ti okudja kounona Nandi-Ndaitwah okwa kala alushe e na olukeno molwashi okwa li e hole okutekula vamwaina nokutula ovanhu kukmwe.

“Otwa putukila meumbo limwe. Netumbo okwa lukilwa meme womumaina wameme wetu,” ta ti.

Okwa ti okudja kounona ohava kala hava ufana ondenge yavo tava ti mee Netumbo molwashi okwa li ve mu fimaneka nove mu tala ko a fa meme wavo.

“Ka kwa li e hole ondjala. Meumbo ohadi mo ta ka toola eembe ndele te twetele ha tushe. Ka kwa li e na okatongo,” ta ti.

Okwa weda po ta ti Namibia oku li melao molwashi okwa mona Omupresidente omutekuli okudja kounona waye.

Kalimba okwa ti xe okwe vatekulila okulonga noudinini, oukriste noshoyo okukala kokule noumbudi.

“Inda u ka longe noudinini ndenge yange. Ino dimbwa osho wa tekulilwa kuxo kutya ka kwa li e hole ovanhu ve na onyalo noumbudi,” ta ti.

Kalimba okwa lombwela ondenge yaye opo i ka ya kule nawa oshiwana nokukondjifa ondjala noluhepo.

Nandi-Ndaitwah okwa pewa omayambeko kovabisofi va yooloka mwa twatelwa omubisofi wongeleka yaAnglican moNamibia, Patrick Djuulume.

Djuulume okwa lombwela Nandi-Ndaitwah opo a twikile okupula kalunga e mu kwatele komesho moilonga yaye efimbo keshe.

Ovakwashiwana ova ti Nandi-Ndaitwah ota dulu okulela oshilongo molwashi oku na olukeno noshiwana okudja petameko a ningwa minista.

Ovakainhu keongalo laNamutai okwa li tava imbi nokukuwilila va hafa mo shili eshi meongalo lavo mwa dja Omupresidente womukainhu.

Pefimbo ta popifa eongalo, Nandi-Ndaitwah okwa pula oshiwana opo shi twikile okumuilikanena molwashi ota kala e na oshinakuwanifa sha kula.

“Ovaanimibia aveshe otava ka kala ve li komapepe ange. Okuninga Omupresidente otashi pula omunhu a ka longe nelitulemo,” ta ti.

Okwa pandula oshiwana eshi she mu hoolola a ninge Omupresidente.

“Onde mu pandula a mushe. Paife ohatu ka longela kumwe okukondjifa ondjala noluhepo. Oukumwe nau twikile moshilongo shetu,” ta ti.

–fhamalwa@nepc.com.na