OTUWALA – Nonando pe na yamwe taya nyenyeta omeya gefundja ga hanagula po iilya yawo, yamwe otaya hambelele oshoka oya etelwa omweelelo omanga yamwe taya ngeshefa.
Oshiwike sha zi ko sho oshifokundaneki shika sha talele po omikunda dha yooloka mondjila yokuya koshitopolwa shaMusati osha li sha mono aantu oyendji pooha dhopate, taya kwata oohi miishana.
Yamwe oya dhika ootenda dhokulala, oshoka ohaya zi kokule niishana mbyoka yi na oohi.
Bonifatius Salomon okwa adhika komutoolinkundana nguka pooha dhopate kOtuwala, omukunda gu li ookilometa oonshona okuza mOshakati, a yedha oohi ta landitha.
“Ethimbo ndika halyo lyokupita wa lala, oshimaliwa kashi na mpoka ihaashi zi. Ngele owa tegelela okupewa to si ondjala, oohi momeya odhu udha mo, kape na ngoka te ku fuka oku dhi kwata,” ta popi ngaaka.
Salomon okwa ti, okapandi ke na oohi dhi li 10 oke na N$30, ta ti mesiku oha vulu okulanditha uupandi uhetatu nenge omulongo.
Ta ti, ookasitoma otadhi ende nawa lela, yamwe ohaya thigi ya mbesitela nale, oshoka ohadhi hakanwa.
Simson Shekutamba okwa ti oha lala a kalela oohi oshoka ngele okwa thigi onete ye momeya, ota adha yakwawo ya yaka mo oohi dhe.
“Ohatu penduka 04h00 tatu tala ngele omwa ya oohi. Otu na okulonga paife, sho omeya taga ka pwiina otu na oohi twa kukutika dhokulanditha osho wo dhokweelela megumbo,” ta popi ngaaka.
Selma Shikongo, a yambukile momukunda Ongali ngoka gu li popepi nOshitutuma okwa ti shoka she ya eta moshana taya lala taya lika koomwe uusiku awuhe, uuhupilo ashike.
Ta ti, oku uvite kutya oyendji ohaya thiki pOshana shoka, oshoka oshi li pomatondokelo gomeya, noohi ohadhi kala mo odhindji.
“Oyendji tu li mpaka ihatu longo, katu na iiyemo yasha onkene otatu kondjitha okukwata oohi osho wo oontangu, tu ka landithe osho wo okufala omweelelo komagumbo,” ta ti ngaaka.
Ta gwedha po ta ti, oye na ethimbo ndyoka haya yi momeya, ya tale ngele omwa ya oohi.
Momeya ohaya yile mo oshita, yo taya zi mo oshita.
Shikongo okwa ti moshana moka oye li mo naalumentu, taya kongo uuhupilo netompelo lyokwiinyangela yoyene, oshoka inaya hala oku ka guma iinima yaantu, yi ininge oonyala oonde.
-vkaapanda@nepc.com.na