Omupresidente gwoshilongo Netumbo Nandi-Ndaitwah okwa ti esiku lyoCassinga ndyoka lya dhimbulukiwa oshikando oshi-47 Osoondaha koWindhoek, olyi na ondjokonona onene omolwoomwenyo dhAanamibia ya dhipagwa momasiku 4 gaMei momvumvo 1978 koAngola.

Ta ti, esiku ndyoka olya simana unene mondjokonona yaNamibia, onkene kehe gumwe ne li shiwe, ye ne li simaneka. 

Ta gwedha ko kutya esiku ndyoka olya kanena oomwenyo osho wo oombinzi dhAanamibia oyendji. 

“MuMei 1978, okamba yoontauki ndjoka ya li mehala hamu ithanwa Cassinga moAngola oya li ya ponokelwa kaakwiita yetanga lyaSouth Africa mboka ya dhipaga unene aakiintu naanona,” ta hokolola ngaaka.

Shavuka Shivute ngoka a li a ningi omunelago sho a hupu eso okwa ti ota dhimbulukwa nawa ayihe ya holoka esiku ndyoka.

Ta ti, esiku ndyoka olya faalele aamwayina, ookume nookomanda yawo. 

Ta kumagidha ta ti, omolwoomwenyo noombinzi dhaantu mboka oshilongo shika shi na ombili nomauwanawa taga tyapulwa nena. 

“Aanyasha naya popiwe nayo opo ya tseye ondjokononandjoka ya tula oshilongo mpoka shi li nena,” Shivute ta ti ngaaka.

Omunamimvo 58 Fransina Iipumbu, ngoka naye a li owala okanona kokakadhona pethimbo lyoshiningwanima, okwa ti oya adhika yu uka kehala hoka haya gongala ano podhelela, sho ya mono oondhila. 

 “Otwa li twa nyanyukwa, molwaashoka otwa li tatu dhiladhila kutya oondhila odhe tu etela omayakulo ngoka tatu pumbwa,” ta popi ngaaka. 

Iipumbu ta tsikile kutya ita dhimbulukwa shoka sha ningwa po, nokwa ka papudhuka ashike e li montsi naantu oyendji ya lala yo nayamwe taya tondoka. 

Kakele kaashoka, Iipumbu ota ti edhimbuluko lyesiku lyaCassinga olya simana mokudhimbulukwa mboka ya kanithila oomwenyo dhawo moshiponokela. 

-vkaapanda@nepc.com.na