OSHANA – Kakukutu kopolifi Inspector General Joseph Shikongo okwa yelayela moilonga ovapolifi 52 oshivike sha dja ko koshitukulwa shaShana nOhangwena.
Ovapolifi 34 ova dja moshitukulwa shaShana omanga ovapolifi 18 ova dja koshitukulwa shaHangwena nova pewa eenghatu da yooloka.
Shikongo okwa ti ombelewa yaye otai twikile okuyelayela ovapolifi tava longo nelitulemo nosho yo okuyakula nawa oshiwana tashi pitile mokukandeka oimbuluma.
Okwa kumaida ovapolifi va pewa eerenka dipe opo va twikile okulonga nondjungu nokukwashipaleka kutya otava yakula nawa oshiwana.
Shikongo okwa ti okwa didilika ovapolifi vamwe hava kala vehe na ombili navakwao ovo va vayelwayelwa.
“Kaleni mu na ombili koilonga. Omupolifi keshe oku na efiku laye okukala a yelwayelwa moilonga ngeenge ta longo noudiinini,” ta ti.
Okwa yelifa ta ti omunhu ngeenge ta yelwayelwa ohaku talika koilonga yaye oyo a longa tai hokifa nosho yo omikalo daye nghene ta yakula oshiwana.
Okwa kumaida ovapolifi opo va longe nouyuuki ngeenge tava yakula oshiwana nosho yo okukala kokule nokulongifa ombabo.
“Otu na ovapolifi ve li modolongo va kwatwa po konima eshi va longifa ombabo,” ta ti. Okwa ti osha fimana ngeenge opolifi i na ekwatafano liwa noshiwana molwaashi otashi kwafele okulwifa oimbuluma.
“Inandi hala okuuda omunhu ta nyenyeta ile ta shuna keumbo ina yakulwa koitaashi yopolifi. Kaleni tamu yakula nawa oshiwana nondjungu,” ta ti.
Shikongo okwa lombwela natango ovapolifi opo va xulife po okunwa omalodu ve li momidjalo doilonga.
“Omupolifi okwa pumbwa okulifimaneka efimbo keshe. Omupolifi ina pumbwa okukala a kolwa komesho yovanhu,” ta ti.
Shikongo okwa ti iha kala a hafa ngeenge ovapolifi tava longo oimbuluma.