Ovanhu va ninga oihakanwa yefundja ovo kwa li va tembukila keetenda paife ova tameka okushuna komaumbo molwaashi onghalo yomeva oi li xwepo paife.
Edi oda kolekwa kukansela woshikandjohoololo shaNgela Elkan Hainghumbi ta ti onghalo yomeva paife oi li xwepo mokufaafanifa nomafiku a pita.
Konima yeemwedi mbali okwa lopotwa efundja la fika koitukulwa ngaashi Ohangwena, Omusati, Kunene, Oshikoto nosho yo Oshana.
Ovanhu ova tembukila keetenda molwaashi omaumbo nomapya oku li koshi yomeva.
Epangelo ola ninga omalongekido okuyandja oikulya nosho yo omayakulo opaunamiti.
Kansela okwa ti ovanhu vamwe va dja komikunda ngaashi Ohaingu nOuhongo ova ya nale komaumbo.
“’Ovanhu ashike ve li 14 ve li keetenda odo di li kOhaingu ashike ovanhu vahapu ova ya komaumbo,” ta ti.
Hainghumbi okwa ti neefikola dimwe oda patuluka paife molwaashi eendjila kadi li vali koshi yomeva.
Kansela woshikandjohoololo Omuntele Sacky Nangula naye okwa ti paife omeva otaa ende taa pwinine moshikandjohoololo shaye.
Okwa ti oshikandjohoololo ashike shaye ku na efundja la dilila koshitukulwa shaShana.
Ngoloneya woshitukulwa shaMusati Erginus Endjala okwa ti ovanhu vamwe ve li keetenda kEtunda otava ende va uka komaumbo molwaashi onghalo paife oi li xwepo.