ONGWEDIVA – Kakukutu kopolifi Inspector General Joseph Shikongo okwa ti moshitukulwa keshe otamu ka dja ovanhu 10 tava di mongudu yelyenge lokulwifa oimbuluma yoMen and Women Network tava ka kutwa mopolifi.
Okwa yelifa ta ti eshi otashi kala tashi ningwa omudo keshe ngeenge opolifi tai kutu ovanhu.
“Ovanhu ashike ve na omido 18 fiyo 45 tava ka kutwa mopolifi,” ta ti.
Edi Shikongo okwe di popya oshivike sha dja ko pefimbo a talela po oshitukulwa shaShikoto, Ohangwena nOshana.
Okwa li a ninga omutumba nopolifi novakwashiwana nelalakano lokukundafana nghene oimbuluma tai kandekwa monooli.
OMen and Women Network ongudu yovakainhu novalumenhu ve liunganeka okukala tave liyamba okulwifa oimbuluma koitukulwa ya yooloka moshilongo.
Shikongo okwa ti nale opolifi okwa li hai kutu ovanhu vatano keshe koshitukulwa tava di mongudu yoMen and Women Network ashike paife omwaalu okwe u wedela.
“Inandi lombwelwa komunhu opo ndi wedele omwaalu ashike osha dja kehalo lange mwene molwaashi ondi na olukeno novalumenhu novakainhu tava longo nelitulemo okulwifa oimbuluma ndele ihava mono odjabi,” ta ti.
Okwa yelifa ta ti omafiku 23 Mei 2025, ovanhu 70 va dja mongudu yoMen and Women Network novanyasha ovo kwa li va tambulwa komadeulo opolifi otava ka nangekwa pambelewa kokapale komaudano kOshakati shaashi paife ova mana omadeulo avo.
“Onda pandula oilyo yongudu yoMen and Women Network molwaashi otai longo noudiinini okulwifa oimbuluma momidingonoko davo. Twikileni okulonga nondjungu,” ta ti.
Kakukutu kopolifi okwa kumaida oilyo yoMen and Women Network alushe opo i kale tai lihumbata nawa komesho woshiwana.
“Xulifei po okukala ta mu tuku ovanhu nokukala mwa kolwa mu li momudjalo weni. Ngeenge omunhu ite lihumbata nawa na dje mo mongudu yelyenge lokulwifa oimbuluma,” ta ti.
Pefimbo lomutumba, Shikongo pamwe novanambelewa vopolifi novakwashiwana ova ongela oshimaliwa shi dulife omaN$25 000 osho sha pewa oilyo yoMen and Women Network yokOhangwena, Oshana nOshikoto.
Oshimaliwa otashi ka longifwa okuyambidida oilyo yongudu yokulwifa oimbuluma ngeenge ya pumbwa omakwafo mwa kwatelwa oipumbiwa ya yooloka.
-fhamalwa@nepc.com.na